[Cpt.Mohammed]

اقتباس:     المشاركة الأصلية كتبت بواسطة cpl  

الطائرة في المقطع وصلت لسرعه Vr وبعد الوصول لها وقبل ثانيتين من الروتيشن قام الفيرست اوفسر بوضع المحرك على وضع الايدل والسبب اتوقع واضح توفير الوقود ... وبالنسبة للخطوط السعودية ممكن ان يكون الطيار حس انه الطائرة بحاجه الى مزيد من الثرست فاعاد تفعيل المحرك والله اعلم

يا غالي مفيش حاجة اسمها توفير الوقود بفصل محرك !! انا مرحل جوي و دارس Federal Aviation Regulations و Performance .. هما أساس شغلي و عارف انا بقول ايه ..

فيه طرق تانية لتوفير الوقود :

- اننا بنختار أقصر Route و المسار ذو أعلي Tail Wind Component لزيادة الـ Ground Speed ..
ممكن نختار Route أطول من Route تاني بس من الممكن ان يكون الأول الطويل الـ Tail wind عنده أعلي .. و سيوفر الوقود أكتر من الـ Route القصير ..

- بنختار أرتفاعات اعلي , و خد بالك ان عشان الطائرة توصل للأرتفاع الأعلي لابد من تقليل وزنها , يعني بنقلل كمية الوقود اللي الطاقم الأرضي بيضخوه في الخزانات .. منه وفرنا وقود علي الأرض و قللنا الوزن عشان تطلع الطائرة علي أرتفاع أعلي و توفر وقود أكتر ( يعني توفير وقود علي الأرض و في الجو ) ..

- تركيب Winglets لتقليل تأثير دوامات الهواء عند أطراف الجناح او ما تعرف بـ Wing tip Vortex , و بالتالي تقليل الـ Induced Drag و هو ما يوفر في أستهلاك الوقود ..

اما اني أقول للطيار أفصل محرك عشان نوفر وقود !! , هنتحال احنا الاتنين للتحقيق و تلغي إجازاتنا و رخصنا و يقاضونا مفتشي الطيران قانونياً و توصل للسجن ...

الطيران بتحكمه قوانين و تشريعات و معايير جودة و سلامة , مش اي حاجة تتعمل في السيميوليتور و تنفع تطبق في الطيران الواقعي .. لأنك قاعد علي كرسيك في غرفتك , الطائرة وقعت .. هتفصل الجهاز و تقوم تنام ... او ان طيار بيجرب إجراء معين علي Full motion Simulator , او ان شركة صناعة طيران او الـ FAA بيجربوا أداء طائرة بدون ركاب ! ..... اما أنتوا بتتكلموا في فصل محرك لتوفير الوقود و فيه مئات الأرواح علي متن الطائرة , و ألاف - أن لم تصل لمئات الألاف علي الأرض من سكان المدن التي تعبر الطائرات فوقها ... ناهيك عن تخسير الشركة طائرة( لو هنبص للموضوع بنظرة أقتصادية كتوفير الوقود ) , احنا أه كمرحلين جويين بنقلل أستهلاك الوقود قدر الأمكان في مقابل زيادة حجم البضائع و الركاب لما تجلبه من ربح , و لكن أمان الركاب و سلامة البضائع و المنشأت و أتباع التشريعات و معايير السلامة تهمنا أكتر من الربح نفسه !!

الفيديو ده اللي فصل فيه الطيار المحرك هي سلسلة تجارب و اختبارات للطائرة , غرض الأختبار ده هو أختبار الـ Accelerate Go Distance , للتأكد بأن الحسابات الرياضية و الجبرية اللي عملها مهندسي تصميم الطائرة صحيحة و ان الطائرة قادرة علي الأقلاع بـ Positive Climb Gradient بمحرك عطلان في حالة تخطي سرعة V1 و محرك عطل ... اما ان طيار يفصل محرك بنفسه لتوفير وقود !! فأنا مش هزود علي اللي قلته أكتر من كدا ...

[الكابتن دحوم]

الله يعطيك العافيه