[مواطن كويتي]

تتيح للعملاء استخدام بطاقاتهم الائتمانية في 60 مطاراً
«الأهلي» يطلق خدمة قاعة كبار الزوار





قال البنك الأهلي انه أصبح الآن بامكان عملائه الاستمتاع بالراحة والفخامة اللتين يستحقونهما في المطارات حول العالم باستخدام بطاقات الأهلي الائتمانية، مشيراً الى أن من أحدث الخدمات التي يقدمها البنك الآن لكل عملائه خدمة قاعة كبار الزوار حيث الفخامة والرفاهية في المطارات حول العالم، اذ يستطيع أي عميل استخدام بطاقات الأهلي الائتمانية للدخول الى أكثر من 60 قاعة لكبار الشخصيات في المطارات أياً كانت درجة السفر على شركة الخطوط الجوية. والأهم من ذلك هو أن هذا العرض يسري على جميع البطاقات الائتمانية للبنك الأهلي الكويتي.






وعن هذه الخدمة الجديدة قال ستيوارت لوكي، رئيس المبيعات والخدمات: «اننا في البنك الأهلي الكويتي نهتم باحتياجات عملائنا، ونرغب في أن نقدم لهم خدمات ذات قيمة مضافة تسهل من الصعوبات التي تواجه حياتهم. وأضاف: «يستطيع عملاء البنك الأهلي الآن أن يستفيدوا من وسائل الراحة والاسترخاء التي توفرها قاعات كبار الزوار في المطارات، بما في ذلك استخدام الانترنت ومكان للاجتماعات والمشروبات الخفيفة بغض النظر عن شركة الطيران أو درجة سفر الراكب، طالما أنه يستخدم بطاقات الأهلي الائتمانية».
وأوضح لوكي ان العناء والتوتر بسبب عمليات تأخير أو الغاء رحلة الطيران أو الازدحام في صالات المغادرة، قد أصبح شيئا من الماضي عندما يكون لديك بطاقة الأهلي الائتمانية.

مبروك لعملاء البنك الأهلي ( ومبروك لي)

www.alqabas.com.kw

[بنت الكويت]

اشكرك على الخبر و اعتقد حتى بنك الخليج جذيه
لكن الافضل بنك الشرق الاوسط لانهم يعطونك مقابل كل دينار 3 اميال :)

تحياتي

[مواطن كويتي]

اقتباس:     المشاركة الأصلية كتبت بواسطة بنت الكويت  

اشكرك على الخبر و اعتقد حتى بنك الخليج جذيه
لكن الافضل بنك الشرق الاوسط لانهم يعطونك مقابل كل دينار 3 اميال :)

تحياتي

الخليج عملاءه يدفعون مبالغ اضافيه مقابل هذه الميزه ما عدا أصحاب الفيزا الذهبيه
الأهلي عنده شراكه مع طيران الامارات و كل دينار يقابله 3 أميال سكاي وردز
ميزة الشرق الأوسط أنه يخير الواحد بين الكويتيه و الامارات و القطريه حسب علمي
لكن وحسب ما شفته من مزايا فمزايا سكاي ووردز هي الأفضل صراحه و مدى الاستفاده منها كبير جدا

[ابو طلال 12]

مشكور اخوي على الخبر

[kuwaity_pilot]

توني بغيت ادز لك رسالة ابلغك فيها عن العرض مال الاهلي
على العموم اهم شي انهم خلو العرض على كل البطايق ما خلوها على البطايق البلاتينية فقط مثل بنك الاوسط

[مواطن كويتي]

اقتباس:     المشاركة الأصلية كتبت بواسطة kuwaity_pilot  

توني بغيت ادز لك رسالة ابلغك فيها عن العرض مال الاهلي
على العموم اهم شي انهم خلو العرض على كل البطايق ما خلوها على البطايق البلاتينية فقط مثل بنك الاوسط

صراحه الأهلي يتحرك صح على البطاقات الائتمانيه
شراكته مع سكاي وردز و عروضه لاستخدام الفيزا من غير فوائد لفترات الصيف و الآن امتياز جديد و غير مسبوق أنه فتح أبواب قاعات الانتظار الفخمه في الكثير من المطارات بشكل مجاني لكل عملائه بس باقي يسوون اتفاقيات مع بعض المحلات انهم يقدمون خصومات على بطاقات الاهلي الائتمانيه
الأهلي ينقصه الانتشار فصراحه من خلال تعاملي معاهم من فتح الحساب الى اليوم وأنا مرتاح و الحمد لله أن فرع حسابي قريب من منطقتي

[مواطن كويتي]

العفو أبوطلال 12 على ردك الطيب

[بنت الكويت]

صح اخوي مزايا سكاي ووردز افضل بس تعال شوف اسعار الايماراتيه اكثر بكثير من باقي شركات الطيران
مثلا لو بسافر الى تايلند على البزنس على ال سي كلاس الي اهيا بزنس راح يطلع لي 10190 تقريبا و السعر 475 دينار مبلغ حلوو و اميال حلوه
و تقدر تسافر على الدرجه الاولى و طلع لك اميال اكثر و بنفس الوقت مرتاح بالطائره اكثر و بنفس سعر الايماراتيه على البزنس او الفرق بسيط

بصراحه انا احب تعامل الايماراتيه جداااااا و احب خدامتهم لكن اسعارهم مبالغ فيها جدااااااااااااا و مره تخفظ الاسعار و مره ترفعها


تحياتي

[kuwaity_pilot]

اقتباس:     المشاركة الأصلية كتبت بواسطة مواطن كويتي  

صراحه الأهلي يتحرك صح على البطاقات الائتمانيه
شراكته مع سكاي وردز و عروضه لاستخدام الفيزا من غير فوائد لفترات الصيف و الآن امتياز جديد و غير مسبوق أنه فتح أبواب قاعات الانتظار الفخمه في الكثير من المطارات بشكل مجاني لكل عملائه بس باقي يسوون اتفاقيات مع بعض المحلات انهم يقدمون خصومات على بطاقات الاهلي الائتمانيه
الأهلي ينقصه الانتشار فصراحه من خلال تعاملي معاهم من فتح الحساب الى اليوم وأنا مرتاح و الحمد لله أن فرع حسابي قريب من منطقتي

بس انا متضايق منهم بشغلىة
اشتري بالفيزا اكثر من 3 الاف دينار تقريبا واخر الشهر القاهم منزلين لي بالحساب 4500ميل
انا مادري شلون حسبتهم
انا شكلي بطلع فيزا الاوسط بدالهم

[مواطن كويتي]

اقتباس:     المشاركة الأصلية كتبت بواسطة kuwaity_pilot  

بس انا متضايق منهم بشغلىة
اشتري بالفيزا اكثر من 3 الاف دينار تقريبا واخر الشهر القاهم منزلين لي بالحساب 4500ميل
انا مادري شلون حسبتهم
انا شكلي بطلع فيزا الاوسط بدالهم

كلامك صح كابتن حمد
بس أخوك (الي هو آنا ) ما خلاهم لحد ما عرف شنو السبب
يا طويل العمر مشكله فيزا الأهلي أنها غير مربوطه مباشره مع السكاي ووردز لأنهم شهريا بتاريخ 15 الشهر يدزون لسكاي كشوف فيها الأميال الي اكتسبها كل عميل فيزا علشان جذي تشوف حساب السكاي آخر الشهر ما دخلت فيها كل الأميال الي اكتسبتها من المشتريات و انا لاحظت هذي الشغله على موقع سكاي انهم بعد تاريخ 15 من كل شهر يضيفون الأميال لحسابك يعني لا تخاف حقك مو ضايع بس في تاخير شوي بايخ من الأهليلو تصير الكشوفات أسبوعيه وايد أفضل لأنها غالبا تكون محسوبه بالكمبيوتر و مافيها تعب على أحد لأن أكيد حسابات الفيزا عندهم وايده

[مواطن كويتي]

اقتباس:     المشاركة الأصلية كتبت بواسطة بنت الكويت  

صح اخوي مزايا سكاي ووردز افضل بس تعال شوف اسعار الايماراتيه اكثر بكثير من باقي شركات الطيران
مثلا لو بسافر الى تايلند على البزنس على ال سي كلاس الي اهيا بزنس راح يطلع لي 10190 تقريبا و السعر 475 دينار مبلغ حلوو و اميال حلوه
و تقدر تسافر على الدرجه الاولى و طلع لك اميال اكثر و بنفس الوقت مرتاح بالطائره اكثر و بنفس سعر الايماراتيه على البزنس او الفرق بسيط

بصراحه انا احب تعامل الايماراتيه جداااااا و احب خدامتهم لكن اسعارهم مبالغ فيها جدااااااااااااا و مره تخفظ الاسعار و مره ترفعها


تحياتي

من مزايا السكاي الفضيه أنك يكون لك أولويه في قوائم الانتظار لو ما كانت متوفره التذاكر على اي درجه في السعر الأقل
يعني لو كان السعر المتوفر 600 دينار على البنزنس لتايلند و السعر الأقل كان 450 دينار (الي على قولتهم ابتداء من ....) لو كان عندك عضويه راح يكون عندك أولويه لو في أحد كنسل حجزه يحطونك علطول مكانه
أما السكاي الذهبيه فممكن يدبرونلج حجز حتى لو كان الحجوزات فووول لأنهم يبون يكسبون المسافرين الدايمين و عادي يأجلون حجز ناس أو يرفعون درجتهم بس علشان خاطر العميل الدايم معاهم
بالنسبه للسطر الثاني والثالث الي فيه الأسعار صراحه مافهمت شي منك

[بنت الكويت]

عدل كلامك اخوي و حتى طيران الخليج لك الاولويه بقائمة الانتظار و عموما الواحد ما يقدر يقارن طيران الخليج بطيران الايمارات لان الفرق الشاسع و ايضا السعر شاسع بينهم

اما الاسطر الي ما فهمتها اقصد فيها ان سعر تذكرة كويت تايلند كويت على طيران الخليج الدرجه الاولى 570 دينار اما الايماراتيه البزنس 625 دينار يعني 1-فرق السعر 55 دينار
2-طيران الخليج فيرست و الايماراتيه بزنس
3-عدد الاميال الي راح تطلع لك مع طيران الخليج اكثر طبعا من الايماراتيه

لكن ارجع و اقول خدمة طيران الايمارات افضل بكثير من طيران الخليج


تحياتي

[بروفيسور الطيران]

اقتباس:     المشاركة الأصلية كتبت بواسطة مواطن كويتي  

صراحه الأهلي يتحرك صح على البطاقات الائتمانيه
شراكته مع سكاي وردز و عروضه لاستخدام الفيزا من غير فوائد لفترات الصيف و الآن امتياز جديد و غير مسبوق أنه فتح أبواب قاعات الانتظار الفخمه في الكثير من المطارات بشكل مجاني لكل عملائه بس باقي يسوون اتفاقيات مع بعض المحلات انهم يقدمون خصومات على بطاقات الاهلي الائتمانيه
الأهلي ينقصه الانتشار فصراحه من خلال تعاملي معاهم من فتح الحساب الى اليوم وأنا مرتاح و الحمد لله أن فرع حسابي قريب من منطقتي

هلا اخوي
حتى عندنا في الامارات نفس البرامج مطبقينها من البنوك

مثل سيتي بنك ، بنك الامارات الدولي، مصرف الامارات الإسلامي، وعلى ما اعتقد بنك أبوظبي التجاري

أنا عندي البلاتينيوم من مصرف الأمارات الإسلامي لازم تصرف اقل شي 4000 درهم يعطونك 4000 مايل

4000 الى 10000 درهم = 4000 مايل
10000 درهم الى 13000 =8000 مايل

13000 وفوق = 12000 مايل

والعديد من المزايا الاخرى

[مواطن كويتي]

اقتباس:     المشاركة الأصلية كتبت بواسطة بنت الكويت  

عدل كلامك اخوي و حتى طيران الخليج لك الاولويه بقائمة الانتظار و عموما الواحد ما يقدر يقارن طيران الخليج بطيران الايمارات لان الفرق الشاسع و ايضا السعر شاسع بينهم

اما الاسطر الي ما فهمتها اقصد فيها ان سعر تذكرة كويت تايلند كويت على طيران الخليج الدرجه الاولى 570 دينار اما الايماراتيه البزنس 625 دينار يعني 1-فرق السعر 55 دينار
2-طيران الخليج فيرست و الايماراتيه بزنس
3-عدد الاميال الي راح تطلع لك مع طيران الخليج اكثر طبعا من الايماراتيه

لكن ارجع و اقول خدمة طيران الايمارات افضل بكثير من طيران الخليج


تحياتي

صراحه بالنسبه لو كنت بسافر على الدرجه الأولى أو رجال الأعمال عوامل كثيره تدخل
ممكن بعض الخطوط مستوى الدرجه الأولى يعادل درجة رجال الأعمال و الكويتيه ممكن تكون مثال حي الدرجه الأولى لحد الحين ما تحولت سليب سيتر و مستوى المضيفين عندهم شوي تعبان
الخطوط القطريه مستوى البزنس عندهم ممتاز لدرجه ان البعض يقولون انه يعادل الأولى عند بعض الخطوط خصوصا في الطيارات الي فيها درجتين بزنس و ايكونومي
بالنسبه لي لو يخيروني اسافر على طيران الخليج درجه أولى على متن 340 او 330 القدم او البزنس على الاماراتيه خصوصا على 777 الجدد بختار الاماراتيه اكيد العوامل وايد تفرق منها الخدمات قبل و خلال و بعد الرحله و كادر الاماراتيه و المسؤولين عن رحلاتها في المحطات كان لي معاهم موقف ايجابي و استطاعوا حل مشكله في احد مطارات استراليا
الاماراتيه في الفتره الأخيره اضافت على موقعها الخدمات الموجوده في الطياره الي بسافر فيها الي بيحجز عالنت وهذا شي ممتاز جدا

[kuwaity_pilot]

اليوم دقيت ع الاهلي وسألتهم ع طريقة الاستخدام
طلع لازم تشترك بالعرض ب 24 دينار سنويا
ويفعلون العرض ع البطاقة اللي عندك او يعطونك بطاقة خاصة بالقاعات

[مواطن كويتي]

اقتباس:     المشاركة الأصلية كتبت بواسطة kuwaity_pilot  

اليوم دقيت ع الاهلي وسألتهم ع طريقة الاستخدام
طلع لازم تشترك بالعرض ب 24 دينار سنويا
ويفعلون العرض ع البطاقة اللي عندك او يعطونك بطاقة خاصة بالقاعات

السموحه منكم عيل
حسبت الخدمه مجانيه صراحه الي يسافر وايد تسوى يدفع اما الي نفسي بالسنه مرتين ثلاثه ما تسوى

[kuwaity_pilot]

اقتباس:     المشاركة الأصلية كتبت بواسطة مواطن كويتي  

السموحه منكم عيل
حسبت الخدمه مجانيه صراحه الي يسافر وايد تسوى يدفع اما الي نفسي بالسنه مرتين ثلاثه ما تسوى

للعلم ترى انا اليوم رديت كلمتهم مرة ثانية وبلغنوني اني اقدر اشترك لمدة شهر واحد بس
يعني قبل لا تسافر دق عليهم واشترك لمدة شهر حق السفرة
استخدم القاعة انت ومرافق بدينارين
يعني حتى لو استخدمت القاعة لمرة وحدة كافي

[مواطن كويتي]

اقتباس:     المشاركة الأصلية كتبت بواسطة kuwaity_pilot  

للعلم ترى انا اليوم رديت كلمتهم مرة ثانية وبلغنوني اني اقدر اشترك لمدة شهر واحد بس
يعني قبل لا تسافر دق عليهم واشترك لمدة شهر حق السفرة
استخدم القاعة انت ومرافق بدينارين
يعني حتى لو استخدمت القاعة لمرة وحدة كافي

تمام احتمال كبير اليوم امرهم عندي كم شغله و مره وحده بسألهم عن المطارات الي اقدر ادخل لقاعاتهم