[طالب طب عاشق للطيران]

كان يا مكان ، كان هناك شخص يدعى : علي بن لبدان
المهم علي بن لبدان هذا كان كل أمنياته في الحياة انه يصير شيخ قبيله
لكن مافيه مقومات وما أحد بيعطيه مجال لأن الشياخه لها ناس وآخرهم علي بن لبدان
بعد ما يأس من الشياخه في قبيلته قال : يا ولد .. أنا بافصل لي جنبيه زي حقت الشيوخ واكتب عليها
الشيخ علي بن لبدان!!
المشكله مافيه دراهم .. قام باع الغنم كلها علشان يفصل الجنبيه (الحلم)
فصل الجنبيه وكتب عليها : الشيخ علي بن لبدان قاتل ميه ومعتق ميه .. !!!
علشان الشياخه تكون على أصولها
المهم طق في الأرض بعد ما باع كل شي علشان هذي الجنبيه
هايم على وجهه لا فرس ولا شي ولا قليل ولا كثير
ومشى وابعد عن ديرته بعييييييييييييييييييييييييد
المهم من كثر التعب جلس تحت شجرة ونام
وهو نايم الا ويشوفونه مجموعه رجال .. جوا قربوا منه وبدون ما يحس
طالعوا فيه ، طالعوا في الجنبيه ::
الشيخ علي بن لبدان قاتل ميه ومعتق ميه !!!
قالوا:
الله يكفينا شره ، هذا ماهو بسيط هذا مطلوبنا اللي بيحل مشاكلنا
المهم صحوه برفق ولين ... شيخ وقاتل ميه ! يعني العفاشه ما تنفع معه
المهم قام الشيخ علي قال : خير وش فيه ؟؟ ( من الخوف طبعاً )
هم : لا لا أبدا بس قلنا تتفضل عندنا هنا يا شيخ علي
هو : هااااااااااه الشيخ علي ، طيب طيب (أول مره يسمعها في حياته)
هم : تفضل تفضل
المهم راح معهم وقهووه وغدوه وريح وقيّل عندهم
وقالوا له : رؤوس القبيله عازمينك الليله على العشاء وطلبناك ان تقول تم
قال : تم تم
المهم اجتمعوا وتشاوروا قبل ما يجي الشيخ المزعوم الشيخ علي
ويوم جاء وتعشى واللي عليه بالخير قالوا له : العلم سلامتك
حنا قبيله ضعوف ما عندنا فارس ولا عندنا شيخ
وقطاع الطرق ذبحونا ما يمر يومين الا وهم داخلين عندنا ياخذون اللي يبغون من حلالنا
وحنا لا حيله ولا بصيره
لمعت عيون الشيخ علي من الفرح
قالوا له : اسمع ، حنا بنحطك شيخ لنا كلنا ،
طبعا الشيخ علي على طول قال : انا موافق (حلمه القديم)
قالوا : بس فيه شروط
الشيخ علي يتمتم : إنا لله ، وش شروطه ؟؟
طيب وش شروطكم ؟؟
قالوا : فيه ثلاثة اختبارات ، ان نجحت فيها تاخذ الشياخه
وان ما نجحت فما لك عندنا الا ضيافة ثلاثة أيام
الشرط الأول : اختبار الفروسية والقتال
الشرط الثاني : اختبار الشجاعة
الشرط الثالث : اختبار الذكاء
المهم فكر الشيخ علي شوي وهو عارف ان مافيه ولا شرط ينطبق عليه
قال : يا ولد ، خلني استفيد قدر المستطاع على الاقل اذا جاء اختبار الفروسيه آخذ من عندهم فرس واحط رجلي
قال لهم : انا موافق
قالوا : اختبار الفروسيه بكره جهز نفسك
جاء اليوم الثاني
قال : انا جاهز . قالوا له : نبغاك تقاتل قطاع الطرق وترهبهم علشان ماعاد يرجعون لنا
قال : طيب بس أبغى فرس متعوده على الكر والفر . قالوا : جاهزه والسلاح جاهز
طبعا الرجال عمره ما ركب خيل
قال : أبغاكم تربطوني على الفرس ربطه ما تنفك
ركب الفرس وربطوه ربطة الشر وأخذ سلاحه
قال : وينهم قالوا : في الجهة الشمالية . قال طيب .. وراح ويوم ابعد وهو يفرك جهة الجنوب
ومشى الا والله ان قطاع الطرق قدامه
ويوم تشوفهم الفرس وتقول بسم الله وعليهم
والشيخ علي يحاول ينزل ، يمين ، شمال ، يحاول يوقف الفرس مافيه فايده رايحه لهم رايحه وهو مربوط ربطه شينه
وهو يطالع الا شجره قدامه
ويوم وصل جنبها وهو يتمسك بها مضبوط لكن الربطه كانت أقوى
وهو يقتلع غصن كبيييييييييير
ويوم شافوه قطاع الطرق وبيده الغصن الكبير هذا وطريقته في اقتلاع الغصن خافوا منه وسلموا واستسلموا . قالوا هذا الداهية عز الله الله بيذبحنا كلنا
اللي قلع ذاك الغصن وراعي هذا الهجوم الخاطف ما لنا الا نستسلم
يوم شافهم الشيخ علي مستسلمين قال :
يالله انت واياه ، واحد منكم يربط البقيه والا والله لاذبحكم ذبح الشاه
المهم ربطهم كلهم وسحبهم وراح للقبيله وهم قدامه مربوطين زين الغنم
ويوم شافوا القبيله قطاع الطرق مربطين قالوا: عز الله شيخ ولد شيخ
ويفكون الرباط اللي مربوط فيه على الفرس ويهنونه ويكرمونه
ويريح الشيخ علي وهو يقول في نفسه : راحت الفرس ورحت انا فيها
جاء اختبار الشجاعة
قالوا له : فيه أسد دايم ياكل حلالنا ونبغاك تقتله
قال : هاااااااااااه !!!! أسد ؟؟؟ عدلوا بدلوا
قالوا : أسد
قال : طيب اتركوني عليه بس أبغى فرس ،، بس غير الفرس هذي
ما تنفع له يبغى وحده حبيبه (ماهي حقت مشاكل)
قالوا : طب وتخير يا شيخ علي
المهم لقي وحده هناك شكلها ضعيفه مالها في المشاكل
قال : هذي
قالوا : يا شيخ علي هذي تعبانه ما هي حقت كر وفر وانت بتقابل أسد
قال : أنتوا تعلموني الكر والفر ؟! وبعدين من هو اللي بيقابل الأسد أنا والا انتوا ؟
قالوا : خلاص يا شيخ علي أنت أدرى
المهم أخذ الفرس التعبانه ويوم يبغون يربطونه قال : لا لا لا لا لااااااااااااا
(خايف من الورطه القديمه)
كل معركه ولها طريقه
أخذ الفرس الحبيبه هذي وتوكل
قال لهم : من وين الأسد هذا اللي يطلع لكم
قالوا : من الشرق
قال : طيب خلاص ، ازهلوه
ويوم ابعد وهو يروح غرب ... ومشى وهو يقول : قالوا أسد !! مجنون أنا ؟!
ومبسوط من الفرس تمشي على أقل من مهلها
مشى الرجال الى ان تعب وهو يشوف ذيك الشجرة الكبيره قال : أريح هنا
المهم ربط الفرس وطلع هو فوق الشجره ونام
شويه الا والاسد محضر ...
الله لا يوريكم الشجره هذي بالذات محل ما يتكي الأسد
أما الفرس من يوم ما شمت ريحة الأسد وهي تحط رجولها وتعود لاهلها
والشيخ علي نايم في سابع نومه
نام الأسد والشيخ علي ينقلب ويطيح على ظهر الأسد
وينفر الأسد
لكن الشيخ علي من كثر الخوف تمسك مضبوط لأنه عارف انه لو طاح انه بيروح فيها
ويحاول الأسد يطيحه ويحاول لكن الرجال متمسك مسكة خواف يعني متسمّر فيه
ويحاول الأسد يطيحه ، يمين ، شمال مافيه فايده الرجال متسمّر ولا هو ناوي يفكه
المهم وبينما هم في صراع (صراع من أجل البقاء) قائم بين الشيخ علي والاسد
القبيله هناك بعدما رجعت الفرس عرفوا ان الشيخ علي تعرض لمكروه
وهم ينفرون كلهم ويلحقونه ويجون الا والله الشيخ علي متمسك بظهر الأسد والأسد يحاول يطيحه
ويجي واحد من القبيله ويقتل الأسد ويطيح الأسد ويموت
والشيخ علي متسمر فيه ويجون عنده الا وهو زعلان مرررررررررررررررره
قالوا الحمد لله على السلامة يا شيخ علي
قال : الله لا يسلمكم !!!!!
قالوا: ليش بس ؟
قال : من اللي قتل الأسد ؟
قام واحد وقال : انا
قال : الله لا يوفقك !!!!
قالوا : ليش ؟؟؟؟؟؟؟؟؟
قال : أنا كنت قاعد أروضه أبغاه ركوبه لي وتجي تقتله ؟؟!!!!! حسبي الله عليكم
المهم اعتذروا منه وتسامحوا منه والرجال سامحهم وياخذونه ويرجعون على القبيله ويعشونه ويحتفلون به
الفارس العظيم مروض الأسود !!!!!!!!!
المهم هو يفكر ويقول : راحت علي الفرس لانه عارف انه ما بينجح في اختبار الذكاء لان مافيه مجال للحظ في هذا الاختبار
جاء موعد الاختبار النهائي .. اختبار الذكاء
المهم جابوا تنكه
وحطوا نصها عسل والنص الثاني بصل
وغطوها وقالوا : يالله يا شيخ علي . تقدر تقول لنا التنكه هذيك وش فيها ؟؟
المهم الرجال قعد يفكر في وضعه لانه عارف انه ماراح يعرف
يفكر ويتذكر كيف الكرم اللي كان فيه والامجاد اللي عاشها اليومين اللي راحت مع هذي القبيله اللي نادوه بأغلى اسم عنده ،، الشيخ علي
فكر وفكر وكيف بيكون وضعه بعد ما يروح من عندهم
وهو يتكلم مع نفسه ويتزفر زفرات من قلبه وبدون ما يحس طلع من لسانه جزء من الشي اللي يفكر فيه قال :
اللي أوله عسل آخره بصل
كلهم صاحوا : صح صح ، جبتها يا شيخ علي
وهم يحتفلون به وهو ما يدري وش السالفه الا بعدما فتحوا التنكه
واخير تحقق حلم الشيخ علي واصبح شيخ قبيله

ان شاء الله عجبتكم القصه ؟؟؟

[سوار الياسمين]

...حكاية لاتخلو من العبرة ...
...وبنفس الوقت ...مضحكة ...
...تقبل مروري ... وبنتظار المزيد من مواضيعك ...

[boom 007]

الله يعافيك ويسلمك ............والله حلم وتحقق هههههههههههههههههههه مصائب قوم عند قوم فوائد

[wadahnahar]

شمرها عميه طلعت مفتحه
حلوه و تسلم على القصه الحلوه و الله احب سوالف الباديه هذه يا اخوان اذا احد عنده منها ياريت يمتعنا فيها

[alshahri]

ياخي نفسي اتعرف على الشيخ على هذا والله انه جيد .
مشكووووور اخوي

[طالب طب عاشق للطيران]

خلوا السنة الدراسية هذي تنتهي على خير وأبشروا بالتواصل المستمر ...
دعواتكم ياحلوين