[AboAyoob]

هذي سالفة (لاصرت بالصمان والقيض حاديك)

نسمع دايم بالبيت اللي يقول ,,

لا صرت بالصمان والقيض حاديك ,, اشرب حليب نياق وخل عنك المرندا


السالفه ,, ان فيه رجال عنده ( ناقه ) وهي عزيزه عليه و غاليه بالحيل ولا يقدر يفرط فيها من كثر مايحبها مثل جدي الله يرحمه
الزبده ,, هالرجال عنده واحد من عياله ,, يحب له ( بنيه ) ويبي يتزوجها ,, والله وراح لابوه وقاله ( يبا ابي فلانه ) وقال ابشر وانا ابوك ,, اخطبها لك من ابوها ,,
و بالفعل راحو يم ابو البنت وخطبوها منه ,, وابو البنت رحب فيهم ، ووافق يزوجهم بنته ,,,
بس اشترط عليهم ان يكون مهرها ( الناقه حقت ابو الولد ) ,,

والله وقال ابو الولد لأب البنت ,, ( اطلب اللي تبي ,, بس هالناقه ما اقدر اعطيك اياها ,, وناقتي عزيزه علي ,, وخلك من هالحتسي )

الزبده ,, ابو البنت عيـّا (رفض ) ,, الا ياخذ الناقه مهر لبنته وقال ناقتك ماهيب أعز عليك من ولدك ,, والله الشايب رفض يعطيه الناقه ورجع يم اهله وولده معه ,,,

ويوم وصلو يم اهلهم ,, قعدوا عقب يومين ,, الا ابو الولد شاف ولده ماهو طيب ,, ومتغير عن اول ,, وعرف انه يبي البنت

وفكر ابو الولد انه يقنع ولده ان هالناقه لها فوائد كبيره ومايقدر يفرط فيهاا بسهوله ,, الزبده طرت له فكره على الصبح

والا اللي هو يروح يصحي ولده من النوم ويقوله امش ياوليدي ابيك تخاويني ( للصمان ) نبي لنا غرض هناك

والله وتخاوو على الطريق ,, وترادفو الناقه ,, وكان ابو الولد يبي ( يتخلص) من المويه اللي معه ( لشي بخاطر الشايب)

والله وفعلا خلصت المويه اللي معهم ,, وذبحهم العطش ( وتعرفون القيض بالصمان)
الزبده ابو الولد يدري وين مكان المويه فيه ويدل مكان الغدير ,, بس سوى حاله مايدري وش السالفه

المهم ,, الحر ذبحهم والعطش جاب فيهم العيد ,, وقام يقول ابو الولد ( والله اللي رحنا فيها ,, والله اللي متنا من العطش والحر )

وكل قصده انه يسمع الولد هالكلام ,, وعقب ما خلص بغو يموتون من العطش ,, وجا ابو الولد ,, وغير مسير الناقه

و وجها يم مكان المويه وهو خابره زين ,, وعاد انتو تعرفون ان الناقه تشعر بوجود الماء ( سبحان الله )

الزبده وهم في طريقهم ,, مره يطيح الولد ومره يطيح ابوه من التعب والعطش ,, ويغمى عليهم مره ويصحون مره

وشوي ,, الا يصحا الولد الا وهو عند الغدير ,, ولا صدق عيونه ,, وبهالوقت ,, استغل ابوه الفرصه

وقاله شفت لولا الله ثم هالناقه والا متنا من العطش ,,,



وقال ابوه هالبيت يبي يذكره أن الناقه أعز عليه من خطبت ذيك البنت :



لاصرت بالصمان والقيض حاديك . . . أيّا حسين الـدل وايّـا المطيـة


بس الولد رايح تفكيره مع البنيه ولا هو ناوي ينساها ,, ورد على ابوه على طول ,, وقال :


الله كريم وما ومر بالتهاليـك . . . ولا ومر بافراق صاف الثنيـة
لاصرت بايام الرخا عند اهاليك . . . . حبة حسين الدل تسوى المطية
قصد الولد بالبيت الأول أنه عارف ان هذي حركات من أبوه



وعقبها ,, ابو الولد غسل ايده من ولده ,, وقال مافيه حيله اني اقنعه ,, يالله نرجع نعطي الرجال الناقة و نخطب لك البنت ، ، ،

[د.حسام]

روعهههههه حبيبي ابو ايوب
بارك الله فيك حبيبي

[World Liner]

سلاااامي عليك يا بو ايوب

قصص العرب فيها حكم

الله يجزاك خير

[DUBAI ATCO]

تسلم طال عمرك مشاركة أكثر من رائعة وهذا ما هوب بالشيء الغريب عمشاركاتك

والله ( الزبدة ) عنده حق واللي عنده ناقه وخاصة" اذا مخلفه مايفرط فيها وهي من أغلى مايمتلك الإنسان فالعصر القديم والحديث أيضا" ..

تأملو قول الله عز وجل

قال تعالى : (أَفَلا يَنْظُرُونَ إِلَى الْأِبِلِ كَيْفَ خُلِقَتْ) (الغاشية:17).
في هذه الآية الكريمة يحضنا الخالق العليم بأسرار خلقه حضاً جميلاً رفيقاً، يقع عند المؤمنين موقع الأمر، على التفكير والتأمل في خلف الإبل ( أو الجمال )، باعتباره خلقاً دالاً على عظمة الخالق ـ سبحانه وتعالى ـ وكمال قدرته وحسن تدبيره . وسوف نرى أن ما كشفه العلم حديثاً عن بعض الحقائق المذهلة في خلق الإبل والتي تدلنا على عظمة الخالق سبحانه وتعالى .

وهذه صورة وتعليق :


كما هو معروف أن الإبل تتزاحم على الماء بقوة خصوصا في حالة العطش

وهذا التزاحم قد يؤدي باحداها خصوصا الصغار منها إلى إضرار بالغة كالكسر وغيره

ولكن أن يصل هذا التزاحم إلى هذا الحد !!!

فلابد أن يكون ذلك ناتجا عن حالة عطش شديدة جدا

مما جعل هذه الإبل تتزاحم على الفتحة الضيقة لهذا الخزان

فإنحشرت روؤسها في هذه الفتحة فهلكت كلها

ولا حول ولا قوة إلا بالله العلي العظيم

أشكرك ياعم أبو ايوب وجزاك الله الف خير

[ابو ضاحي]

جزاك الله خير ويعطيك العافيه
على توضيح معنى البيت

[redbaron]

قصة جميلة مع اني واجهت بعض الصعوبة في المصطلحات العامة

[AboAyoob]

شاكر و مقدر مروركم أخوني جميع
و كثير هي القصص الرائعة و اللي لها أبيات شعرية تتداول بين الناس ، مع عدم إطلاعهم على مناسبة ، هذه الأبيات

بالنسبة للصور اللي وضعتها أخوي DUBAI ATCO
صورة مفزعه جداً
و الله يخلف على صاحبها بالخير و يرزقه من خير النعم
و أقول - الله يرأف بحالنا ، و يمدنا بشكر نعمه علينا و التي لا تحصى
مشكور ومافصرت على إثرائك الموضوع و بالتوفيق أن شاء الله للجميع

[.::قوية بربي::.]

يعطيك العافيه كابتن قصة جميلة..لا تبخل علينا بالمزيد منها..

[جناح جده]

دقيق مع شعبيات ابو ايوب
قصه جميله ومشكور على توضيح المناسبه
ومما لفت انتباهي سرعة البديه عند الولد وكيف رد
على ابوه بأدب واحترام وقصيده مقابل قصيده
ويعطيك العافيه ومشكور

[عاشق السيارات]

مشكووور اخوي

[AboAyoob]

جناح جدة
قوية بربي
عاشق السيارات
شاكر لكم مروركم بالموضوع

[عاشق الطائرات]

والله من جد

قصه روووووووعه
وتحياتي ليك كابتين ابو ايوب

[صقر الثمامه]

لا صرت بالصمان والقيض حاديك ,, اشرب حليب نياق وخل عنك المرندا ..

ولاتنســــــــى " الضبان " هههههههه

يعطيك العافيه أبو أيوب ...

[A.T.M.Pilot]

يعطيك ألف عافية أبو أيوب
ومشكور على القصة الرائعة

[AboAyoob]

عاشق الطائرات ، صقر الثمامة ، أخوي محمد
شاكر مروركم و تعقيبكم الجميل على الموضوع
بالتوفيق ان شاء الله

[+[ المها ] +]

:ANSmile15: الله الله يا كابتن ابو ايوب سالفتك هذي ورتنا روعة الماضي واهله
شوفو معي مو قف الاب في منتهى الجمال حاول مع ولده باللين وبالتجربة الحية ما قاله مثل اباء هالوقت:<بقريح جعلك ما اعرست!!انا بأصرف عليك لي متى؟هماك رجال دبر عمرك>
<اقول يا ولدي خذها مني وانا ابوك ما هنا حرمتن تستاهل العنا هذا اني اخذت امك وجبتك ويش صار يعني؟>
وأخرتها هالاب الكريم يبيع الناقة وولده بعد ويتزوج مسيار!!!!<<كيفه حلاله وهو حر فيه:iconloli:
الزبدة عساك على القوة كابتن ابو ايوب والله يطول بعمرك..وما شاء الله عليك..في كل مجال انت متألق بصدق

[لايطول غيابك]

بيض الله وجهك ابو ايوب.. انا اسمع القصيدة ولكن ماعمري عرفت القصة.. جزاك الله خير.

[أنثى دافئة]

عمري ماسمعت هذا المثل
والان سمعته وفهمته
يعطيك العافية :)