[Jassas]

أهلا ياشباب

اليوم كانت مقابلتي في الرياض يوم الخميس أخر يوم عمل قبل الإجازه.. والحمد لله والشكر عديت المقابلة وجاني قبول وعطوني أوراق الفحص الطبي. وباحكي لكم و صار معي.

قبل المقابلة الشخصية:-
جيت الساعه الثامنة صباحا، وبدو ياخذون طول ووزن الشباب كانو تقريبا 16 شخص، جاء دوري قالي عطني 3 صور شخصية وصور من الشهادات والخبرات واصل الهوية الوطنية وجواز السفر، وبعدين وقف على الميزان ( وصار يقولي بشكل ودي، اهم شي لما تدخل المقابلة تصافحهم، وتكون مبتسم ولا تشبك يدينك وتكلم بهدوء) وقال هذا الكلام بيني وبينك - جزاه الله خير - ، بعد ماخلصوا كل الشباب انتظرنا ربع ساعه بعدين نادوا بعض الاسماء (9 اشخاص تقريبا) ودخلهم للجنة على طول كمجموعة، قالو لهم ( انتم وزنكم زايد ونعتذر لإجراء المقابلة معكم) وبقى باقي الشباب وصرنا ندخل بالدور واحد واحد ( كل واحد تقريبا 8 دقايق، وفيه ناس بسرعه ينتهون من المقابلة) انا كنت اخر واحد. ولاحظت الي يقبلونهم يعطونهم اوراق الفحص الطبي عشان يكملون إجراءاتهم.

المقابلة الشخصية:-

دخلت وكانو 3 وصافحتهم وإبتسامتي شاقه الغرفه (تعليمات صاحبنا الي برى) صراحه ماتوقعتها بالسهوله هذي والسلاسة، يعني كنت متخيلها أكثر تعقيد وتحشير الوضع جدا سهل واسئله بالعربي والانجليزي واغلبها إجابتها ب 3 كلمات وباقولكم وش سالوني عنه.

الشخص الاول سألني:-
1- عرف بنفسك (إنجليزي)
2- وين درست، ووش كنت تسوي (إنجليزي)
3- أذكر لنا موقف عصب فيه ( قلت له الهلال وسيدني) قال لي الله ياخذ نيشيمورا ههههههه

الشخص الثاني سألني:-
1- ماذا تعرف عن المضيف الجوي
2- ماهي الصفات المطلوبه بالمضيف الجوي

الشخص الثالث قال:-
تراك بتنظف حمامات، وتخدم على الناس!
1- وين شاف نفسك بعد 5 سنوات

بعدين الشخص الاول طلب من افسخ الشوز "الله يكرمكم" وامشي قدامهم رايح جاي، بعدين قال افرد يدينك على الطاولة وورني رقبتك!، بعدين قال اوك شكرا.. إستريح برى وتراك لازم تنقص 3 كيلو " وهناااااا عرفت اني عديت المقابلة بنجاح"

بعد المقابلة:-
انتظرت برى دقيقة وجاء الي قاس وزني ووداني لواحد يعطيني أوراق الفحص الطبي وقال مبروك قبول مبدئي، ورحت وعبيت النموذج بعدين رحت لدور آخر فيه الخدمات الطبية وعطاني نموذج وقال سو الفحص ب الورود ولازم تكون صائم اقل شي 6 ساعات


نقاط مهمه:-

* الوزن: حتى لو زايد 10 كيلو بس يكون الجسم متناسق يمشونك على حسب وش تسوي بالمقابلة " المشد قد يكون حل" لكن من الافضل الحين تشتغل على نفسك وتنقص وزن بالي تقدر عليه قبل وقت المقابلة. ومثلا لو زايد 8 كيلو وجاك ايميل تختار موعد المقابلة لا تختار أول يوم وتنكب نفسك، حاول تختار اخر يوم عشان يكون فيه وقت اطول تضبط فيه وضعك وانصحكم ب رجيم"الصيام المتقطع" من تجربة شخصية :)


* الأناقه: لازم لازم لازم تكون متأنق "كنك رايح تخطب، أو اكثر من كذا" ملابسك مرتبة وكرفتك مضبوطه تحت البنطلون بسنه وبخصوص نوع الملابس " بتجيك ب الايميل وش راح تلبس" دقنك مضبط، شعرك ولادي " بدون قصات".

أثناء المقابلة: ابتسم تكلم ب إيجابية على طول لو كنت مثلا تشتغل بشركه أبدا لا تتكلم عنها بسوء، خلك طول الوقت إيجابي لو سالك وقالك اذكر لنا موقف عصبك لا تقول والله واحد الي يوصل طلبات تأخر علي بالطلب!! جب لهم شي لا يتعلق بالوظيفة بصله ( الملاح الجوي راح يمثل السعودية والخطوط السعودية أمام الناس في الطائرات او المطارات) ف يبون واحد مرن بشخصيته. وأيضا، ب يحاول يجيب طاري الحمامات والخدمه الناس وكيف ترضى، حاول تكون إجابتك بشكل عام " ديننا وعاداتنا تحثنا على مساعدة الأخرين، مثلا)


* حبيت اعطيكم تجربتي كاملة، لعلى وعسى تكون مفيدة لبعض الاشخاص.. ويمكن تجربتي هذي ماتكون مثل تجربتكم فاهي تفرق من شخص لشخص.. لكن أتمنى التوفيق للكل.. ويارب نخلص امور الفحص ونخش الدوره ونصبح ملاحي مقصوره

تحيتي..