طيب معلهشى ياكابتن مؤمن سؤال وهامشى
هل لو ما لكشى واسطه خالص واتخرجت من كليه مصر للطيران 375000 جنيه وخدت التايب رايتنج100000جنيه كل ده مقدور عليه لانه فى الاول و فى الاخر فلوس لكن الواسطه عمرك ما تعرف تشتريها من الاخر يافيه يامافيش مالهاش تالت !
هل بعد كمان التايب رايتنج اللى على حسابك ها تحتاج واسطه قويه علشان تشتغل فى القطاع الخاص
بالله عليك ما تهمل الرد على هذا السؤال لانه بجد مهم جدا والوحد نفسه يعرفه ربنا يباركلك ورمضان كريم علينا وعليك
وبالله عليك ما تحاول تتجنب السؤال وتقول ان الرزق بتاع ربنا الواحد متأكد انه بتاع ربنا بس الواحد برده مطالب انه يسأل ويستشير بالذات الناس اللى محتكه بالمجال وخصوصا بانسان مخلص زيك ومش مستنى حاجه من حد ومعلهشى ركز شويه على الشركات الخاصه لان من الاخر مصر للطيران معروفه للجميع ايه اللى بيتعمل فيها لكن الشركات الخاصه هانسمع عنها منين ؟ ! يعنى قصدى حاول ترد باللى عرفته وشوفته او سمعته وانت مش مسئول عن تحديد اختيارات حد انت بس بتعملها من باب اللهم انى بلغت اللهم فاشهد بعد كده كل واحد يعمل اللى عايزه انت بس بتقول اللى تعرفه وتسمعه وكل اللى بنطلبه منك انك تبلعه لينا لان احنا ما عندنا فرصه نسمعه ونعرفه زيك
لانك درست فى مصر وتعمل فى مصر ! يعنى من الاخر ما قدمناش غيرك ومش هانسيبك :-p
وربنا يباركلك على اهتمامك واخلاصك
لان مش معقوله الواحد بعد ما يدفع كل الفلوس ده يكتشف حقيقه ممكن تكون مره ولو كان بس تعب نفسه وسأل شويه قبل ما يدفع كان يمكن عرف كل حاجه وساعتها القرار قراره بس على الاقل يكون عارف
علشان كده بقولك مشاركتك مهمه بشكل كبير
وشكرا
أكيد طبعاً هساعدك زي ما انا كنت محتاج مساعدة قبل كده - عيب الكلام ده - احنا أخوات
بخصوص موضوع لو انت درست علي حسابك و عملت تايب ريتينج علي حسابك مش لازم واسطة قوية عشان تدخل قطاع خاص - بمعني انك تحتاج زقة بس - الأعداد كثيرة و كلهم بيقدموا
لكن في حاجة - في العربية للطيران فتحوا في مصر في الأسكندرية
دول مش عايزين وسائط. هما بيأخدوا منك ثمن التايب ريتينج, و هما يدربوك عليه في مقرهم في الشارقة. و انا أعرف كذا واحد دخل من غير وسائط
هي حتي الواسطة عاملة قلق دلوقتي عشان الضغط كبير و فجئة كله بقي يدرس طيران. علي عكس من3 سنين, كنت تلاقي كل الخريجين في السنة الواحدة 16 أو 17.
دلوقتي الدفعة 60, و بيجي من بره ناس يعملوا معادلات, دول لوحدهم تعدوا الـ 200
و بطبيعة الحال, الواسطة تيجي
الله أعلم, يمكن الموضوع يهدي شوية و الدنية تتيسر ثاني علي وقت ما تخلص دراسة !!
و بالتوفيق للكل