السلام عليكم
ماقصرتوا ياشباب والله يعطيكم العافية
وسوف ادلو لكم بدلوي
انا أشوف أن من أهم الاشياء غير الاشياء الشخصية الي هي الملابس وغيرها الشهادات والأوراق الرسمية زي شهادات الثانوية الجواز قرار الابتعاث اذا صدر وجميع الاوراق حق البعثات حتى بطاقة الأحوال الرخصة شهادة الميلاد كل هذي لازم تكون عندك لها صور على الأقل 4 او 5 صور من كل شي على شان لا سمح الله ضاع شي ولا ماشيات يكون عندك بدالها أو حتى يمكن الملحقية تطالبك فيها او اذا واحد بيطلع رخصة سواقه هناك اذا طقت براسه وياليت بعد لو تجيب الاصل للاحتياط وتزبنها مع اوراق الابتعاث الاصلية
وفي حاجة ثانية الي هو لابد يكون عندك حساب بنك هنا وتكون تقدر تسحب من أي صرافة هناك ما اقصد فيزا او ماستر كارد لان ما تقدر تشيل مبلغ كبير معاك هناك فلازم يكون عندك حساب تصرف منه وزيادة على كذا تاخذ معاك شيكات سياحية لضرورة بس لازم تتاكد من البنك أني اقدر اسحب من اي صراف هناك أو حتى صراف معين لحد ما تفتح حساب هناك وبرضو يفيد بعدين وانا اذكر لما سافر اخوي لكندا فتح حساب فبنك ساب وهو تابع تقريبا او فرع من البنك اتش اس بي سي (
HSBC) وهو بنك عالمي وعنده فروع بكل مكان بالعالم لكن أنا أقول كل واحد يروح يسأل بنك ويقولنا وش قالوله عشان نعرف وانا ان شاء الله بسألكم وردلكم خبر
وأيضا لو تجيب معك بوصلة تفيد بتجاه القبلة وآلة حاسبة
وبالنسبة للملابس حاول على قد ماتقدر انك ما تاخذ كثير لان ترى بعض شركات الطيران وحتى الخطوط السعودية الان ما تسمح بأكثر من 25 كيلو أو 32 كيلو لكل شخص على ما اعتقد وتكون مقسمة على اكثر من شنطة واذا زادت عن الوزن المسموح عليها مبالغ كبيرة فحاول توزنها قبل لا تروح المطار على شان ما تقعد تطلع من اغراضك قدام العالم كنك بياعة بسطة يعني حاول تاخذ معك شنطة كبيرة وشنطة متوسطة وتدخل معك بالطيارة شنطة صغير شنطة ظهرولا حاجة على اساس تحط فيها اوراقك الي تحتاجها والاشياء الي تحتاجها بالرحلة عطر كريم ديودرنت مشط سوالف زي كذا
واسف على الاطالة <<مابغيت تخلص
