من قال جزاك الله خيرا [ فقد ابلغ في الثناء ]َ ،،
جزاك الله الف خير اخوي والله يسهل لك الخير اينما وجد واينما كان ،
فعلا مدرسة جميلة جدا وتقرير وافـي ، ولكـن انا مثل ماوضحت لك
في الخاص حبيت اطرحه هنا عشان الكل يستفيد ،
1- بالنسبة للافيزا كيف اجراءاتهاوهل استخراجها سهل؟
2-اللغه الانجليزيه عندي مبتدي واعرف امشي حالي ولا يوجد
لدي التوفل ولا السأت فهل هذه سوف تاخرني في الدراسة ،
3- واذا رغبت في اخد الرخصه الاوروبيـة Jaa فهل تنصحني بها وهل المده تستغرق اكثر من Faa في الدراسـة
4- بالنسبة هل فيه نظام دفعات في الكليـة اذا ماكنت قادر على ان ادفع المبلغ كله ،
5- ماهي الاجراءات التي يجب ان اقوم بها وماهي اول خطوه لاني جاهز الان واريد الذهاب ؟
لك خالص تحياتي ،،،
دمت على طاعته
اهلا وسهلا بيك اخ وصديق حبيبي وجزاك الله خير جزاء ان شاء الله
بالنسبه للفيزه فـ ان شاء الله سهله ومافيها اي تعقيد (افييتر كولج هي كليه وليست مدرسه واجرائاتهم بالفيزا اسرع من المعاهد و المدارس و الاكادميات)...فقط تعمل تسجيل وتدفع رسوم الفيزا وخلاص..الكليه ترسلك I20 وبعد ماتستلمه تراجع السفاره ويعطوك الفيزا
بالنسبه للغه الانجليزيه فـ حتى لو كان مستواك محترف بالغه فـ لازم تحصل على شهاده الايكاو لانه بدون هاذي الشهاده ماراح تحصل على عمل او حتى تقدر تدرس طيران (اذا كان مستواك جيد فـ ممكن تنهي خلال سبوعين او ثلاث..وذا كنت حاب تاخذ الكورس كله ممكن يطول شهر للمستوى الرابع...اما اذا كان مستواك اقل ممكن يوصل شهرين) لكن صدقني الايكاو سهلللللللللل جداً جداً واي واحد ممكن يحصله لانه محصور بمعلومات الطيران و الامتحان هو مجرد انك تجلس مع احد الممتحنين الي يعمل في الكليه ويسألك اسأله عامه الغرض منها انه يشوفك فاهم عليه ايش يقصد و الامتحان مايطول.....وخلاص الف مبروك الشهاده
لاتحتاج السات او التوفل في حال اختيارك للبرامج (الايكاو فقط يكفي)
سات +توفل 500درجه فقط للاسوشييتد دكري
في افييتر كولج عندهم JAA وعندهم ايضاً FAA و الاختيار يرجع لك لكني الFAA اسرع واسهل ومافيها تعقيد ...أما ال JAA فالنضام اوروبي وفيه تعقيد شوي واصعب لكثره المواد النضريه و الاختبارات
بالنسبه للدفعات فـ مافي اي مشكله تقدر تدفعهم على شكل 3او 4دفعات...وتقدر تسحبهم كلهم في حال الغائك للعقد ضمن المده المسموحه
الاجراات و اول خطوه هي انك تستخير الله وتسأل الله التوفيق
الخطوه الثانيه تحضر اوراقك الرسميه (جواز سفر و الجنسيه و تترجم الثانويه العامه)
لازم يكون عندك او عند اهلك حساب بنكي يثبت المقدره على دفع تكاليف الدراسه (عشان توريه للسفاره )
طبعا الi20 يكون عندك خلال 3او 4ايام
هناك ابلكيشنات اثنين للحكومه الامريكيه لجميع الدارسين في الولايات المتحده الامريكيه والي هي tsa و SEVIS
بالنسبه للtsa فـ هاذي لغرض الطيران و بصمات الاصابع بعد ماتيجي على امريكا... ويكلفك حوالي 390دولار لجميع الرخص (هاذي رسوم حكوميه لجميع الطلاب في امريكا)..تعبي الابكليشن قبل المجيئ الى امريكا وتعمل البصمات في الكليه
اما ال sevis فـ هاذي بعد ما تحصل على الi20 تعمله وتكلفته حوالي 250 عشان الباكراوند شيك (في حال مافي عندك اي مشكله جنائيه او منع سفر او غيرها من الامور الي فيها محاكم) بعد ماتنتهي من هاذي تصدر الفيزا وتقدر تسافر بنفس يوم صدور الفيزا
طبعا كل هاذي الابلكيشنات تقدر تخلصهم في 10دقايق وسهلات جداً وانا اقدر اساعدك فيهم لو حبيت (معلومات اساسيه وشخصيه فقط)
الان انا شرحتلك كلشي من الالف الى الياء ان شاء الله