إمممممممممم ببدأ أفصفص موضوعك شويتين و أتمنى تستحملني ..
أول حاجه صباح الخير ..
ثانيا : موضوعك بعنوان رسالتي للمضيفين الجويين في الخطوط السعودية
و كلامك في الموضوع عن كافة موظفين الخطوط السعودية و أنا ما أقدر أرد عن كل موظف فيهم لكن بحاول أرد عليك في مجال عملي ..
أنا مضيف في الخطوط السعودية و أتمنى من كل قلبي إن ربي يوفقني في كل رحلة عشان أسوي شيء يرضي ضميري قدام ربي ..
لكن يوم تقارن لي رحلة أوكلاند سنغافورة برحلة جدة المدينة إسمح لي أقولك المقارنة ظالمة ..
يوم تقارن الركاب اللي عندهم بالركاب اللي عندنا بتكتشف مقدار الظلم بالمقارنة ..
عندنا الشعب الوحيد اللي ينادي المضيف : بس بس بس (( كأنك تنادي بسه )) ... أو يا محمد أو يا هيه ..... ما أدري ليه يحسسونك إنك سواق و جايبينك بفيزا من عندهم ..
عندكم شعب هنا ما ينفع لهم إلا وجها عبوسا قمطريرا ..
واحد تبتسم في وجهة يحسب إنك توك جديد و يستلمك طلبات .... إشي بطعمي و إشي بدون طعمي على قولة إخواننا السوريين ..
بالله شفت واحد يشرب بيبسي و بعدين يطلب قهوة عشان اللي جنبه يطلب قهوة ؟؟
شفت واحد يطلب 7 كاسات موية و لسه يطلب كمان ؟؟
و تقولي إبتسامة ؟؟
يا عمي طييييييييييييييييييييييييييييييير معلييييييييش
و للأسف الشعب عندنا ما بتفرق معاه سواء سياحي أو أولى أو أفق ..
و لسه تبغى إبتسامة ؟؟
(( ما تكلمت عن الجداول الزفت اللي تنزل لنا أو عن مشاكل الشغل الداخلية .... لأنها بتبقى داخليه و بنحاول نحلها بنفسنا ))
ما أقولك إنه كل الركاب كذا .... بس أقولك الرحلات الداخليه أغلبها كذا مع الرحلات الدولية للمناطق اللي إنتم عارفينها ..
=========================
رحلات أوربا و أمريكا بتختلف فيها الخدمه لإختلاف نوعية المسافرين و بتطلع وقتها الأخلاق الإٍسلامية على أصولها ..... يوم ألاقي راكب يسألني و يقول لي لو سمحت ممكن موية غير يوم يجيني واحد طالع بتذكرة جدة المدينة و يصرخ يا محمد موية بسرعه ..
و بالنسبة يوم تقول إنه المضيفة جاتك مسرعه و تساعدك في الشنطه و هيا كبيرة .... لكن المضيف على الخطوط ما ساعدك مع إنه الشنطه صغيرة .. ودي أقولك قصة صوغننة أوي :
واحد بلدياتنا شغال مضيف جوي و جاه راكب و طلب منه يشيل الشنطة و يحطها فوق المقعد ... أخونا في الله إشتغلت الأخلاق الإسلامية عنده و شال الشنطة و حطها فوق و في نهاية الرحلة راح الراكب و إشتكى المضيف و قال في الشكوى المضيف رفع الشنطه و رماها بقوة و كسر اللابتوب اللي جوا الشنطه ..... و للأسف دفع أخونا ثمن شهامته في مسافر ما يعرف من الإسلام إلا إسمه .. و النظام يمنع إنك تشيل الشنطة للمسافر ..
ودي أسألك .... إلى الآن ودك نبتسم ؟؟ :)
و نقطة أخيره :
سافر جدة الرياض درجه أولى و الرياض جدة درجة سياحية و بتعرف الفرق الفعلي بين الدرجتين :)
لا تهتم بالقشور و تنسى الأصل
السلام عليكم أخي العزيز مرة أخرى
أولا أخي الكريم و حبيب قلبي ....
أنا لما اتكلمت عن تعامل المضيف الجوي في الخطوط السعودية و الخطوط السنغافورية
كنت أعطيك مثال واقعي حصل معايا ... لكن لما تقول مقارنة ظالمة اسمحلي ..
هيا مقارنة عادلة .... مع احترامي و أنا متفهم رأيك ... لكن تعال نبدأ وحدة وحدة
أولا : خلينا نبدأ بمهنة المضيف الجوي بشكل عام ..
قبل ما تبدأ في مهنة الضيافة الجوية ما كان هناك اختبارات على قدرة التحمل
وكنت عارف من قبل لا تصير مضيف جوي انك راح تلاقي مضايقات كثير من المسافرين
و كنت عارف كمان انك راح تتعب من الرحلات و ان هناك رحلات كثيرة راح تجي عليك فجأة
و ممكن ياخذوك في وقت إجازتك و أظن ان الكلام هذا حاصل في جميع شركات الطيران
على مستوى العالم
إذا من الواجب عليك انك تتحمل المهنة اللي انت أخترتها بنفسك
و بعدين محد أجبرك انك تشتغل مضيف جوي و من واجبك انك تبتسم للمسافرين
و تعاملهم بأحسن تعامل
ثانيا : لما تقول مقارنة ظالمة بين الرحلات الداخلية و الخارجية ....
تعال نبدأ .... رحلة من المدينة إلى جدة .. كم ساعه ؟ ... تقريبا ساعه و 40 دقيقة
مع ذلك المضيف تلقاه ما يبتسم مع انها رحلة قصيرة جدا .
لكن رحلتي كانت من أوكلاند لسنغافورة و تقريبا الرحلة كانت 11 ساعة
تخيل نص يوم في الطائرة و المضيف شغال طول الوقت و أبتسامته معه على طول
هيا بالله فين الظلم ...
انت تشتغل ساعه وشوي و الثاني يشتغل تقريبا 11 ساعه و مع ذلك مازال محافظ على صبره
و أخلاقه الحسنة و ابتسامته .. وهذا يدل على انهم يؤدون عملهم على أكمل وجه
و التقصير بيحصل من بعض مضيفين الخطوط السعودية ...
ثالثا : نجي نتكلم عن المسافرين ...
يا أخي العزيز ... الناس مو كلهم زي بعض و صحيح كلامك ان في ناس كثير بيحتقروا مهنة
الضيافة الجوية .. لكن يا أخي انت عارف انه راح يصيرلك كذا و أكيد عارف كيف تتعامل
مع هذه النوعيه من الناس و إذا ما كنت عارف اسمحلي ترى ما انت مضيف جوي كفؤ ...
أنا و الله أحتقر الناس اللي ما تحترم هذه المهنة أو أي مهنة أخرى
لأني و الله عارف ان المضيف الجوي يؤدي عمل صعب و الواجب علينا اننا نشكره
لكن ما زال عندنا ناس في العالم العربي ما يعرفوا قيمة العمل و الإخلاص فيه
و في ناس كثير متكبرين عندنا
حتى يا أخي العزيز .. لما المسافرين ما يعاملوك بإحترام لكن قد يكون بينهم شخص يحترمك
و يقدر المهنة اللي انت تعمل فيها و قد يكون نفسه يكون مثلك و أنا كنت واحد منهم
لما انت تبدأ تعامل المسافرين تعامل سيء و ما تبتسم لهم
الشخص هذا اللي يحترمك و يقدر مهنتك راح يتأثر نفسيا و ممكن ما راح يحترمك طول عمره
و المفروض انكم ما تعاملوا السيء بالسيء لأنكم ما راح تلاقوا إلا الأسوء
و بعدين اللي يطلب مويه و لا ببسي انت مو من حقك تمنعه أو تقول ليش هذا يطلب كثير
الشخص هذا دافع فلوس و انت مانت دافع شيء من جيبك
بالعكس الواجب عليك تلبي طلبه و بكل إحترام لأن هذه من إحدى مهام المضيف الجوي
يا أخي قد يكون الإنسان مريض ولازم يشرب مويه كثير ...
رابعا : نجي نتكلم عن الشنطة ...
لما تقول ان المضيف ممنوع يشيل شنطة داخل الطائرة
يا أخي أنا كنت أحتاج مساعدة لا أملك سوى يدين تخيل لو جاء أحد ما عنده يد ما تجي تساعده
كل اللي طلبته أنا مساعدة فقط لا غير
مع ذلك جات المضيفة و الله تجري و تقول خليني أساعدك
ايش معنى هيا جات و انت ما تجي مع انكم تشتغلوا بنفس المهنة
هذا يدل على ان في شيء ناقص عندنا .....
و زي ما قلت انت هو موضوع صغنن لكن هذه لها سلبيات
و السلبيات هذي راح تضرك انت كمضيف جوي في تعاملك مع الأخرين
(( أكرر مرة أخرى ليس كل المضيفين مثل بعض فمثلما هناك جانب سلبي أيضا هناك جانب إيجابي ))
أنا بتكلم عن الجانب السلبي ....
........
تعال أخي لموضوع الجداول حقت المضيفين .. ولا أقولك بلاش أتكلم فيها لأني ماعندي خلفيه تااااامة عنها .... لكن يا أخي مثل ما انت عندك جداول أيضا مضيفين الشركات الأخرى الأجنبية لديهم جداول و قد تكون أقسى من جداولكم مع ذلك بعملون بكل حب و احترام و إخلاص ...
ليش ما نتعامل بأخلاق الاسلام
انت طرحت نقطة مهمة و خلينا نتكلم عنها ....
لما قلت (( ودي أسألك .... إلى الآن ودك نبتسم ؟؟ :) ))
أيوة نعم إلى الآن و دي انكم تبتسمون
و ليش ما تبتسمون انتم لستم الوحيدين اللي بتشتغلوا مهنة قاسية
و في مهن كثيرة أقسى من الضيافة و انت من واجبك انك تبتسم
يا أخي اذا ما قدرت تبتسم ليش تشتغل في هذه المهنة و انت ما انت قدها ...
خلينا نرجع لكلام الرسول صلى الله عليه و سلم (( الإبتسامة في وجه أخيك صدقة ))
حتى لو واجهت منه ما يسوء لك
انت بابتسامتك هذي ما تدري ممكن راح تخلي الشخص اللي قدامك يتغير و يحترمك أكثر
رجاءا أخي أتمنى أني أرجع و أشوف المضيفين بابتسامتهم
..........................
و بعدين لما تقول (( سافر جدة الرياض درجه أولى و الرياض جدة درجة سياحية و بتعرف الفرق الفعلي بين الدرجتين ))
يا أخي ايش معنى هذه المدينتين اللي فيها الخدمة ممتازة
و بعدين انت لو كنت تبغى توصل للأفضل راح تسوي مع الرحلات الثانية كمان
ليش ما تحط نفس الخدمة هذه للرحلات من المدينة جدة أو غيرها ...
أنا عارف انها ماهي مسؤوليتكم كمضيفين جويين .. لكن انت كمضيف جوي
سوي اللي تقدر عليه و حاول قد ما تقدر انك ما تخلي المسافر يخرج من الطائرة وهو زعلان
حتى لو انه غلطان ..... مثل مشهور .. دائما يقولك (( الزبون دائما على حق حتى لو كان غلطان ))
......
أخي و الله ما ألوم الشركات اللي طلعت للمراتب الأولى و أهنيها على طموحها للوصول للأفضل و أهني المضيفيين اللي فيها اللي يفتحون نفس المسافر ..
و للأسف إني ألوم الخطوط السعودية اللي ماهي حاطة في بالها أهم شيء وهو انها توصل للأفضل
و الله لا أعتقد ان هذا هدف من أهداف الخطوط السعودية لذلك تجد الكثير من الموظفين
لا يتقنون عملهم و لا يبالون فيما يقدمون و هذا أكبر خطأ
..........
بس تخيل معي أخي لو تعاونت أنت و زملائك على انكم تغيرون من تعاملكم و تحطو هدف
وهو انكم ما تجعلون المسافرين يغادرون الطائرة إلا وهو مبسوطين بالله ايش راح يكون شعورك و شوف النتيجة كيف راح تكون أقلها عاملهم انت بأحسن الأخلاق و لا تنظر للسفيه من المسافرين
........
أو تخيل لو أصبحت الخطوط السعودية من أفضل شركات الطيران في العالم
شوف بعدين التغير الكبيررر اللي راح يحصل فيها و في رواتب المضيفين كمان
و أتمنى ان هذا اللي يصير
إحترامي لك أخي و تقديري و آسف ان كان ثقلت عليك بكلامي
لكن و الله عتاب نابع من محبة و حرص على انكم تكونوا الأفضل
وانا متفهم جدا لكلامك
لكن لازال هناك أشياء تحتاج إلى تعديل
تقبل أحترامي و خالص تقديري و آسف على الإطالة
محمد