السلام عليكم ورحمة الل وبركاته
بسم الله الرحمن الرحيم
انا هحكى قصتى مع اجراءات تحقيق حلمى للطيران من الاول وياارب يكون فيها فايدة لاى اخ من الاخوة الكرام فالمنتدى العظيم دة
انا مصرى وهتكلم بالمصرى وبحريه تاامه وياريت تفهمونى بقى واعذرنى يامشرف علشان دايما الكلام من القلب بيوصل للقلب علطول
امممم فالبدايه خلصت ثانويه عامه وكنت عايز ادرس طيران والفلوس كانت جاهزة فجأة لاقيت الوالد صرف الفلوس
مبقاش فى سفر ومبقاش فى طيران وقدمت فكليه هندسه الطيران فالقاهرة وقضيت فيها سنه وتعلقى بالطيران ذاد اكتر واكتر فقررت انى اعاند اهلى "ودا كان قرار خاطئ" لان اهم شئ رضاهم وقررت احول من الكليه
حولت فعلا لكليه تانيه هندسه بردة بس قسم مدنى عشان ابعد عن الطيران ومبقاش قاعد دايما شايل الهم بس بردة فضل الحلم ورايا ورايا
قضت فالكليه الجديدة هندسه شعبه مدنى واول سنه جبت تقدير وتانى سنه وحاليا خلصت الترم الاول من السنه التالته
يعنى كدة بقالى 4 سنين مستنى احقق حلمى ومستنى الفرج من عند ربنا
المهم كنت بدعى فرمضان وعلطول الدعاء مش بيفارقنى ونمت كتير معيط عشان ربنا يفرجها وفليله من الليالى اللى الحظ ضحكلى فيها نمت وصحيت "مفاجأاااه لا على البال ولا الخاطر "
صحيت لاقيت الفرج من عند ربنا جه والفلوس جهزت وخلاص بدل ماكنت فدوامه الدراسه فكليه الهندسه لاقيت نفسى هبدأ فاجراءات السفر لدراسه الطيران
مالفرحه ماكنتش مصدق اساسا
الحمدلله الحمدلله الحمدلله وراسلت مدرسه DEAN INTERNATIONAL FLYING SCHOOL فى ميامى فلوريدا الولاايات المتحدة
وجانى جواب القبول ورحت اشتريت اليونيفورم والفرحه بقى ماتتوصفش
مع ان الفلوس كانت جاهزة والحمدلله تقضى دراستى وزيادة بس ماكنتش حابب اتقل على ابويا فالفلوس لان بردة لسه بعد ماخلص دراسه وارجع مصر هضطر اعادل الرخص ب8500 دولار عشان اخد الرخص المصريه
المهم دخلت على موقع السفارة الامريكيه وعملت الابلكيشن ورحت الCIB دفعت ال1120 جنيه ودفعت ال200 دولار سيفيز
واتحددلى معاد فالسفارة الامريكيه فالقاهرة يوم خميس وجهزت حالى وحلقت دقنى وخلاص كله تمااام
جه يوم الاربع ونمت بدرى وصحيت صليت الفجر ونزلت ركبت ورحت القاهره
التأمين عالسفارة شديييد ويوتر وناس كتير بتقدم اللى رايح يتعالج واللى رايح يدرس واللى رايح سياحه
رحت هناك وقفت فالطابور واتفتشت طبعااااااااا والتفتيش كان بيضحك لان العساكر زى مايكونو عايزين يشيلوك لفووووق خالص عشان لو فى حاجة تسقط منك ههههه
المهم شاف الباسبور والورق ودخلت من الباب .. الباب زى مايكون فلاذ وتقيل جداا
دخلت قلعت الحزام تانى وطلعت الفلوس الفضه اللى فجيبى والموبايل سلمته والورق وعديت على الجهاز لاقيته بيدى انزار
اتارى الجزمه فيها قطع معدنيه هههههههه رحت قالع الجزمه وعديت وكله تمام
دخلت جوة ونزلت سلم ولاقيت طابور وقفت فيه اخدو الورق واخدت رقم ودخلت قعدت
اعداد كبيرة وانا قاعد من التفتيش وكدة اتوترت وكنت متوتر لوحدى اصلا وبراقب الوضع عامل ازاى
شويه ولاقيت رقمى عالشاشه رحت ولاقيت بنت مصريه بتقولى ممكن الباسبور والورق .. اوك اتفضلى وبضحك لاقيت الموضوع بسيط والحمدلله أكنى اخدت التأشيرة خلاص ههههه لسه ماتصمدتش
قالتلى اقعد هناك وهننادى عليك رحت قاعد وشويه لاقيت رقمى تانى ظاهر عالشاشه رحت لشباك رقم 6 لاقيت واحدة حلوة قاعدة ههههههههه
بتقولى حبيبى ممكن الباسبور بالمصرى ههههههه قولتلها شور واخدته
سألتنى عايز تدرس ايه قولت طيران طب فين .. فميامى طب والدك شغال ايه " ماكنتش عارف اسم شغلانه ابويا ههههههه " قولتلها مدير عام بالمصرى قالتلى ساكن فين فمصر قولتلها دمنهور البحيرة بالمصرى طالما هيا بتسأل بالمصرى بقى
عندك اخوات .. اه عندى 3 . فين كشف الحساب .. اهو اتفضلى ..
لاقيتها بتقولى حبيبى محمد ممكن تحط صوابعك من ايدك الشمال هنا قولت فعقلى بالى انتى تؤمرررى
حطيت ايدي اليمين وبعدين الشمال وبعدين بتبصلى وانا منتظر اسمع مبروك
لاقيتها بتقولى انا موتأسيفه يامحمد خبيبى انا مس خقدر اديلك الفيسا لامريكا انت تكدر تدرس طيران هنا فى مسر او اى بلد تانيه
صدمه شدييدة وببصلها جامد ولاقيتها بتديلى الباسبور اخدته من سكاات ومشيت
وطلعت برا صدمه كبيرة جدااا الحلم فجأة ضااع ومبقاش موجود والواحد صعبت عليه نفسه وكنت بعيط جوايا كدة وقفلت الموبايل وطلعت ركبت وروحت ودخلت البيت علطول نمت ماكلمتش حد
وقعدت ادعى وقولت يمكن اختبار من ربنا """"" مع العلم اانا كنت مصلى استخارة ان لو الدراسه فامريكا ليا فيها خير يبقى ربنا يوفقنى ليها ولو فيها شر يبقى ربنا يبعدنى عنها """""
المهم قررت اقدم تانى وعملت نفس الاجراءات ودفعت الفلوس وحددت معاد جديد وطلع بردة يوم خميس
هههههههه قولت يوم الخميس حلو بردة هيبقى وشه حلو عليا اكيد عكس المرة اللى فاتت المهم نمت بدرى ورحت تانى
تفتيش تفتيش تفتيش وتأمين رهيب ودخلت واستنيت دورى ووقفت فطابور كدة ولاقيت نفس البنت بتشاورلى عشان اروحلها هههههههههه اه يانا يامااااا كفايه حرام عليكى
رحت رايح عليها قولتلها انا عملت معاكى المقاببله الاسبوع اللى فات """ طبعا محدش بيعرف سبب الرفض لانهم بيرفضو بمزاجهم"""
قالتلى روح على شباك 109
رحت لاقيت اتنين قدامى واحد عجوز مقدم على فيزا علاج واترفض قولت تشاؤم والتانى مقدم على فيزا شغل واتقبل لانه كان شغال هناك اصلا فعادى اكيد هياخدها يعنى
جه دورى ودخلت .. الكلام بالانجلش المرة دى مفيش عربى
ازيك الحمدلله شكرا لسؤالك.. ممكن الباسبور .. اكيد اتفضل .. اول مرة تسافر برة مصر .. ايوة .. طب ركبت طيارة قبل كدة .. لا دى اول مرة هسافر وهركب طيارة واصلا رايح اتعلم الطيران فامريكا علشان امريكا بلد كويسه ومن احسن الرخص وشويه كلام كدة
هزر معايا وضحك واتفائلت قولت خير ان شاء الله هاخدها لاقيته بيقولى ازاى كشف الحساب زاد من 100 الف ل400 الف فاسبوع !!!!! قولتله والدى باع ارض وحط فلوسها قالى طب ازاى زاد من 400 الف ل450 الف ف3 اايام قولتله كان فى قسط باقى من اقساط الارض والناس سددوة
بصلى باستغراب وقالى انا مش هقدر اديلك الفيزا علشان ازاى انت عايز تدرس طيران ومركبتش طيارة ققبل كدة قولتله انا كنت مشغول بدراستى واصلا الباسبور قدامك فاضى انا مسافرتش عشان اركب طيارة
قالى لا اقصد مانت ممكن تركب طيارة فوق مصر وكدة قولتله لا احنا الكلام دا مش مكانش فبالى عشان اعمله
قالى اسف مش هقدر اديلك الفيزا طبعا بيتلكك وبيقول اى سبب وخلاص
قولتله اوك شكرا اخدت الباسبور وطلعت طبعا كل اللى شوفتهم مرفوضين وكله طالع زعلان وبيدعو على امريكا واحباط فالمكان كله
رحعت وفتحت النت ادور على اى مخرج لاقيت ناس كتير اوى سعوديين ومن كل الجنسيات العربيه مرفوضين واعداد كبيرة جدا ولاقيت ان نسبه الرفص بتوصل ل99 فالميه وطبعا المستفيد امريكا لان على كل مرة رفض بياخدو فلوس والواحد بيحاول اكتر من مرة يعنى هما مالاخر كاسبانين على قفانا
رحت مطار القاهرة اشوف اى حاجة اسأل اى حد
لاقيت كابتن اتعرفت عليه وسألته كان دارس فى جنوب افريقيا قولت وماله مش وحش ايه يعنى جنوب افريقيا
قالى الدراسه صعبه بس احسن من امريكا بكتير وتدريب اعلى ونظام الدراسه JAR بس الرخص CAA
قولت وماله مش عيب
وسألته على مدراس وكدة قالى على اكتر من اسم
فتحت جوجل وبحثت على Central flying academy """"" معلش طولت عليكو بس يااارب ياارب لعل وعسى يكون فى حل لمشكله اى واحد او تفاؤل لاى واحد محبط وبردة عايز اعيشكو الجو معايا """""
لاقيتها اكاديميه ممتازة واتعرفت على شخص عالفيس بوك درس فيها وبالصدفه كان فمصر من شهر ولسه راجع وكدة
رحت قابلته وعرفت منه كلللللل حاجة بالتفصيل وانها كويسه جدا واسعارها جميله جدا وفمطار راند وكويسه جدااا
اتوكلت على الله وصليت استخارة ورحت عشان اقدم على تأشيرة جنوب افريقيا وامريكا عملتلى جوف من الرفض منها لله ههههههههه
رحت وعرفت عايزين اوراق ايه وراسلت الاكاديميه ودفعت رسوم التسجيل ووصلنى جواب القبول وعملت التأمين وكله تمام فمصر
رحت السفارة قالولى عايزين تأمين من شركه تكون موجوده فجنوب افريقيا طبعا راح عليا التأمين بتاع مصر
الحمدلله دايما طبعا
عملت تامين على النت فشركه فجنوب افريقيا ودفعت بالكريدت وكله تمام
يوم الاربع اللى فات رحت واستلمو منى الباسبور ودفعت 6000 جنيه فالسفارة ضمان تقريبا او حاجة كدة وباذن الله حاخد الباسبور يوم الاربع الجى بعد بكرة وهحجز بعدها علطول وهسافر على جنوب افريقيا ادرس الطيران واخيرررررررررررررررررررررررراااااااااااا
والحمدلله ربنا اكيد له حكمه ف انى اترفض مرتين فامريكا يمكن مفيهاش خير ليا والخير موجود فجنوب افريقيا
اكيد كل حاجة من ربنا خير والحمدلله ماسبتش حلمى ودورت ومانمتش لحد ماوصلت للحظه دى ولسه باذن الله
اتوكل على الله وخليك واثق فيه واتمسك بحلمك هتعمل المستحيل وهتلاقى نفسك تعمل حاجات ماكنتش تتوقع انك تعملها اصلا
كل حاجة وكل مشكله وليك ربنا هيحلهالك بس انت اسعى واتعب وخد بالاسباب واصبررررررر الصبرررررر اهم حاجة
دلوقت انا بقول يمكن لو كنت رحت امريكا كنت فشلت او يمكن لو كنت اخدت الرخص من امريكا كنت قعدت فترة طويله ماشتغلش
ويكون المستقبل فجنوب افريقيا احسن وبعد البحث لاقيت ان الرخص الجنوب افريقيا احسن ممن FAA اصلا والجرواند اسكول احسن ومعلومات اكتر هتفدينى بعد كدة فالمعادله وفالشغل
الحمدلله حمدا كثرا دايما قول الحمدلله واشكر ربنا هيزيدك
والله العظييم " لاحول ولا قوة الا بالله ماكانت بتفارق لسانى " وليها تغيير كبير اوى فالحياه والله
ياريت يكون الموضوع عجبكووو ومعلش طولت عليكو :poster_nospam::poster_nospam::poster_nospam:
ان شاء الله اول ماوصل هنزل تقرير مفصل عن الاكاديميه بالصور وكل المعلومات وهقولكو كل حاجة بالتفصيل ان شاء الله لو لينا عمرر
انتظرونى بالجديد وان شاء الله خيرررر باذن الله
سؤال فأخر الموضوع بقى """هل الرخص CAA لجنوب افريقيا ينفع تتعادل لFAA و JAA والرخص المصريه والسعوديه عادى ولا بيبقى فى مشكله وفعلا رخصه جنوب افريقيا فالشغل صح !
تحياتى وباذن الله انتظرو كل المعلومات والجديد من جنوب افريقيا
اخوكم محمد
