مثلما وضح الأخ العزيز atc tabuk مشكوراً , يتم تسليم الطيار اولاً بأول عبر وحدات المراقبة الجوية المختلفة ..
و سأذكر بعض النقاط التى لم يذكرها أخى العزيز , لو ان الطيار يطير في جو غير مراقب كالطيران فوق الأطلسي او فوق المناطق المنعزلة Isolated areas , يحدد مداه من المجال المراقب من خلال خرائط الـ WAC لو طاير VFR او خرائط الـ High/Low Enroute لو طاير IFR , (بتكون عبارة عن خط يحدد حدود المجال المراقب عبارة عن شكل سماعات هاتف باللون الأخضر او خط متعرج "زيج زاج" و يوجد بجوارها مربع يحتوى على تردد وحدة المراقبة ) كما بالصورة بالأسفل
المجال الجوي MONCTON بتردد 133.5 ميجاهرتز
و مثلاً .. لما يقرأ الطيار مسافة معينة بالـ DME من محطة VOR .. ألخ , او يعبر نقطة معينة .. يبدأ في الأتصال بالمجال المراقب .. و يحدث هذا بالظبط أثناء عبور الأطلسي ناحية مجالات شانويك و ريكلافيك
النقطة التانية .. بعد اعداد خطة الطيران او الـ Flight Plan طبعاً بيكون محدد الطائرة هتدخل الـ FIR لكل دولة في وقت كذا , ولما بيتم "تفييل الفلايت بلان" بالأنجليزية Filling Flight Plan , بترسل نسخة لوحدات السيطرة الجوية لكل دولة بأن الطيارة كذا بتسجيل كذا .. حمولتها كذا .. هتدخل الـ FIR عن طريق نقطة Entry point كذا .. الساعة كذا .. وهتخرج من الـ FIR عبر نقطة Exit Point كذا .. الساعة كذا .. و بالتالى كل وحدات الـ Center للمراقبة الجوية لكل البلاد اللى هتطير فوقيها بتكون عارفة انك داخل مجالهم الجوي الساعة كذا عن طريق نقطة كذا , و بيكون النظام بتاعهم عليه رحلتك ..
سؤالك عن امتى بيتم بدأ الأتصال بالبرج .. ألخ , كما ذكر الأخ العزيز atc tabuk وحدات المراقبة الجوية مسلسلة و كل وحدة لما بتخرج عن نطاق مجالهم الجوي المراقب او عن نطاق تخصصهم بيبعتوك للوحدة التالية عن طريق أوامر Contact Cairo XX APP / TWR / CTR on 111.111 ..
سؤالك التانى :
2- الرحلة دبي - لندن / السؤال هو عند المرور فوق الاراضي التركية (مثلا) متى يتم اعلام السلطات التركية او الجهات المختصة ؟ وهل يتم دفع رسوم لذلك ؟
سؤال كويس : متى يتم اعلام السلطات التركية !! - دا يتوقف على لوائح سلطة الطيران المدنى التركية .. هقولك بالظبط اللى بيحصل : اولاً قبل الرحلة بكام يوم بنفتح جزء في كتب Jeppesen اسمه Entry Requirements , الجزء ده بيحدد : اجراءات طلب الـ Overfly او الهبوط في مطارات الدولة , هل تحتاج Landing Slot ام لا ؟ , طريقة التقديم على Overfly علشان تحصل على Overfly slot , نموذج التقديم و طرق أرساله , بالفاكس .. باللإيميل .. بالـ ARINC .. بالـ AFTN .. عن طريق التليفون ..
بعد الحصول على طريقة التقديم على الـ Overfly slot , بنقدم عليه و بنرسله لسلطة الطيران المدنى للدولة بوسيلة الأتصال المذكورة في Jeppesen للموافقة على طلب عبور اجواء الدولة ..
بعد وصول رد من سلطة الطيران للدولة بالموافقة على عبور اجواءها , بيكون رد الموافقة عبارة عن حاجة اسمها Overfly slot بيكون محدد بوقت دخول للمجال الجوي FIR للدولة , و وقت خروج منها !!
الكلام ده بيحصل في دول الـ Euro control و الدول اللى واقعة تحت سيطرة حلف الناتو زي أفغانستان و باكستان , وظيفتهم انهم بينظموا الكثافة الجوية بمواعيد الوصول و مغادرة المجالات الجوية للدول الواقعة تحت سيطرتها , سلطة الطيران اللى وافقت على الـ Slot قبل ما بتوافق بتكون بعتت للـ Euro control طلبك , و عند الـ Euro control جهاز اسمه ATFM او Air Traffic Flow Management System , بيحسب كام رحلة طالبة عبور المجال الجوي كذا في اليوم , و نسبة الطائرات المتواجدة في المجال الجوي و المغادرة من مطارات الدولة , و بناءاً على هذه المعلومات ينظم هذا الجهاز توقيت دخول و خروج كل طائرة حتى يكون عدد الطائرات ثابت في المجال الجوي لا يزيد ولا ينقص ..(مايزيدش مرة واحدة ويحصل ارتباك جوي ) .. طبعاً شغل الجهاز ده معقد للغاية .. وهو اللى بيحدد لكل طائرة وقت دخول و خروج المجال الجوي , طيارة تخرج وتانية تدخل وبهذا يصبح العدد ثابت ..
لازم نحصل على موافقات كل الدول اللى هنطير فوقيها ..
بالنسبة للرسوم .. دا يتوقف على سياسة الدولة , فيه دول بتشترط علشان تبعتلك الموافقة لازم تبعت الرسوم بالكريديت في حساب كذا و بيكون موضح تفاصيله .. فيه دول بنكون عاملين معاها اتفاقيات و بتتبعت رسوم العبور في اي وقت او على الحساب في بنك من بنوك الدولة ..