الانترفيو ده بيسألوكى عن نفسك عرفى نفسك وبتعملى ايه فى حياتك وليه عاوزه تكونى مضيفة وليه اختارتى مصر للطيران وقالولى احكي لينا موقف ساعدتى فى حد قبل كده وليه سبتى شغلك السابق وحاجه حابه تغيريها فى نفسك وحاجه ندمتى عليها بس على فكرة دى الاسئلة بتتغير من واحده للتانيه هما بيسألوكى من ردودك يعنى انا لما كنت بجاوب يسالونى السؤال الى بعده من ردى يعنى انا قولتلها انى بحب القراءة قالتى ايه اخر كتاب قرتيه قولتلها اسمه قالتلى استفدتى منه ايه هما بيزنوقوكى عشان يعرفوا بتكدبى ولا لا هو بيكون زى دردشة كده عشان يتعرفوا على شخصيتك ويقروا لغة جسمك عشان يعرفو اذا كنتى كدابه ولا لا مهزوزة ولا واثقه من نفسك هما مدربين على كده على فكرة يعنى انا مثلا كانت بتسألنى سؤال وهى بتبص على حاجه ورايا مش بصالى عشان تشوفنى هلف ابص ولا هركز فى سؤالها فاهمة

كلها دردشة عنك انتى وعن شخصيتك
لا مفيش عملات وعواصم دى بتكون فى الانترفيو الى بعد ما تنجحى فى الاختبار النفسى
بالتوفيق انشاء الله

هو لو جه سألنى why you choose egypt airline ?? انا عارفه ان الاجابه بتكون عن انجازات الشركه مثلا او اجابتى تكون عن مدى نجااح وانجازات الشركه فتخلى اى حد بيسعى للنجاح انو يقدم . بس انا مش لاقيه اى داتا عن انجازات egypt air خالص ممكن تسااعدينى .

بصى هتقولى ان مصر للطيران دى هى من أوائل شركات الطيران فى افريقيا والشرق الاوسط وانها اول شركة طيران فى افريقيا والشرق الاوسط تحصل على شهادة الايزو وده كان سنه 2004 وانها عضو فى اهم وأكبر تحالف طيران عالمى وهو ستار الينس واتكلمى عن عدد المسافرين على متن طيرانها سنويا وعدد العاملين فيها هتلاقى كل المعلومات دى على موقع الشركة

https://www.egyptair.com/English/Page...tEGYPTAIR.aspx H أو ويكيبيديا

basma عملتى ايه أحكيلنا

الحمد لله انك عملتى كويس وهو يوم سهل والناس فعلا متعاونين وفعلا الانجلش بتاعهم ضعيف جدا وكويس انك فضلتى تجاوبى بالانجليزى هما عملو انترفيو مع كتير بالعربى بس طبعا افضل انك توصلى الى انتى عاوزاه بلغة انجليزية مفهومة احنا كمان كنا بندخل 7 بس كل واحده كانت بتقعد على مكتب من دول قدام 3 مش واحد

انا كان اللجنة بعد النفسى بأسبوعين بس غالبا انتو لازم تمتحنوا الفاينال قريب جدا عشان انا سمعت انهم لازم يخلصوا كل الامتحانات ويطلعوا النتيجة على نهاية الشهر

ذاكرى العملات والعواضم ومعلومات عن الشركة ومتقلقيش الانترفيو ده بيكون بالكتير اوى 5 دقايق ولازم تفضلى مبتسمة دايما لازم لازم لازم وظبطى وزنك لانهم او حاجه بيعملوها بيقيسوا الطول والوزن لازم وزنك يكون " الطول - 110= الوزن المثالى " وهتلاقى حد فى اللجنه بيحاول يستفزك مثلا لو انتى تخينه هيقولك انتى تخينه او يعلس عليكى ويقولك انتى مش بتبتسمى ليه خليكى هادية ومتظهريش اى انفعال وهيسألك عن نفسك فى ناس اتسالت فى اسامى الوزراء وناس لا الاسئلة بتتغير

بصى طولك ووزنك تمام بس هما ميزانهم خربان مش هيطلع زى كده هيطلع فرق 2 او3 كيلو بس تمام يعنى

بصى العواصم انتى ذاكرى الوجهات الى بتروحها مصر للطيران يعنى البلاد دى وعواصمها هما غالبا بيسألو عن عواصم شمال افريقيا واوروبا والدول العربية اعملى بحث عن وجهات مصر للطيران وذاكرى البلدان دى بعملتها بعواصمها وكمان البلاد الى عملتها يورو اعرفيهم
موضوع السياسه ده بقى فى بنات اتسألت فيه وفى ناس لا فى ناس سالؤها عن الاوضاع الحاليه وعن اسماء الوزراء وفى ناس لا

وانشاء الله ربنا يوفقنا واشوفك فى يوم على الطيارة واتعرف عليكى بس ادعيلى :) :)

شكرااا كبيره ليكى وان شاء الله ربناا يوفقك يا جميل انتى تستاهلى كل خير طيب تمااام انا هحاول اعمل ده وربناا يسهلهااااا ان شاء الله :) صحيح هو كمان بيسألو فى لغة البلاد ؟؟ و انتى اصلا خلصتى كل الاختبارات حتى الطبى ولا لا ؟

لا مبيسألوش بس لو انتى كاتبة فى السى فى بتاعك لغة تانية فرنساوى ممكن يسألوكى بالفرنساوى

انا خلصت الفاينال لسه محدش عمل الكشف الطبى لان مفيش ولا نتيجة فاينال ظهرت نتايج الفاينال هتظهر لما كل الناس تخلص امتحانات والى هينجح هيدخل الطبى

انشاله ربنا يوفقنا كلنا لما يكلموكى ابقى فرحينا معاكى :)

بسمة شوفى اللينك ده
https://www.flyingway.com/vb/showthread.php?t=134654

ايوه فهمتك بس هما مش بيسألو عن لغة البلد كمان الانترفيو ده كله بالعربى بيسألوكى بالعربى وتردى بالعربى او بالانجليزى زى ما انتى عاوزه عادى

بليز داني انا عملت النفسي ونجحت ومستنيه يكلموني عشان اللجنه هو لو الوزن زياده شويه عن المثالي بس الشكل كويس ورفيع بيبقا رد فعلهم ايه وكمان عايزة اسال عن اللبس انا عارفه انه فورمال بس الافضل البس اسود ولا الوان عادي سمعت ان الاسود الافضل بس انا عايزة البس الوان

بصى لو انتى شكلك كويس ومش باين عليكى ان وزنك زياده عن المثالى هيقولولك ان لازم تخسى وهيسألوكى محتاجه اد ايه عشان تخسى لحد ما تنزلى عند الوزن المثالى وبعدين هيحددولك ميعاد تانى بعد فترة عشان تعملى اعادة وزن هما عملو كده مع ناس كتير كان فى ناس مش باين عليها انها تخينه بس فى فرق وزن حوالى 10 كيلو وناس 15 وناس 30 كيلو زياده وادوهم فرصة يخسو ويرجعو تانى يعملوا اعادة وزن
انتى حاولى تعملى دايت لحد ميعاد الانترفيو عشان ميبقاش عندك فرق وزن كبير لو 2 او 4 كيلو ممكن يتغاضوا عنهم

اللبس مش مهم الوان او اسود وخاصة اننا دخلنا فى الصيف والملون بقى عادى فى الفورمال المهم الوانك متكنش كتير وفاقعه البسى حاجه انتى مرتاحه فيها ومتكتريش فى الالوان

انا سمعت اني لازم البس اسود واللي بشعرهم بيلبسوا جيب ع الركبه وهل كان ف ناس لابسه ملون عادي ؟

مفيش حاجه اسمها لازم تلبسى اسود انا مكنتش لابسه اسود وكان فى معايا ناس لابسه أحمر فى اسود وناس لابسه كحلى والوان عادى المهم يكون شكلك كويس ومفيش حاجه اسمها الى بشعرهم يلبسوا جيب على الركبة بس طبعا لو هتلبسى جيب متلبسيش طويلة مكسى يفضل عند الركبة ولو عايزة تلبسى بنطلون عادى جدا المهم متلبسيش جينز اللبس فورمال ولو محجبة متلبسيش كذا ايشارب فوق بعض والبسى ملون عادى بس متأفوريش وربنا معاكى

ميرسي ياداني ربنا معانا جميعا بس لية مالبسش كذا طرحه فوق بعض

أنا النفسى عملته فى شهر 12 والفاينال كان بعده بأسبوعين
الافضل انك تلبسى حجاب بسيط ومتنفخيش راسك بطرح كتير لو بتتفرجى مثلا على المذيعات المحجبات ده افضل من الحجاب الكاجول لانه انسب للفورمال كمان بلاش الحجاب Spanish عشان بيعلقوا عليه

انا امتحنت يوم 12-3 وطلعت النتيجه بعدها بشهر ونص ولسه مكلمونيش عشان اللجنه ربنا معانا جميعا

تمام فهمت قصدك ميرسي ياجميل ومش بحب الايسبنش اساسا

يعنى انا ف الطبيعى بعمل سبانش .. بعدين ازاى بيعلقوو يعنى دى حاجه سلبيه ولا ايجابيه ؟؟ اكيد طبعاا انا بعمله رقيق جداا ومش برفعه او اكتر ف الطرح وكمان اعرف انو مايكونش منقوووش حاجه بسيطه كده بس انا بعمل سبانش ؟؟

فى بنت كانت عاملاه وقالولها انتى ازاى محجبة ورقبتك باينه وعملة الحجاب كده؟؟

مساء الخير داني بجد شكرا عل الطرح الممتاااااااز ده كلك ذوق ممكن اسألك كام سؤال
- لون الملابس محدد يعني هما محددين لون معين اسود فقط (انتي كنتي لابسة ايه :D )
- الأسئلة ال20 الي في البداية ممكن تديني امثلة عليها
- لو عندك نصائح بخصوص discussion group ممكن تقوليلي اتعامل معاها ازاي
ولو نصائح عامة للمقابلة لأنك مريتي بالتجربة
معاش طولت عليكي ياجميلة وفي انتظار ردك ضروريييييييييي :)

الالوان مفيش الوان محدده البسى الى يريحك المهم مايكونش فاقع ولا الوان كتير حتى المكياج والحجاب لو انتى محجبة يكون بسيط

انا فى النفسى كنت لابسه جيب وجاكيت اسود وقميص ابيض وفى الفاينال كنت لابسه جيب وجاكيت جراى وقميص لبنى :)

انا مش عارفه انتى تقصدى ايه بالاسئلة ال 20 وبتتكلمى عن اى مقابلة النفسى ولا الفاينال