[سسلام عليكم]

بسم الله الرحمن الرحيم



السلام عليكم ورحمه الله وبركاته

انا خريج طالب ثانوي

نسبتي 93 ثانوي والقدرات 70 وهذا اعلى شي جبته باقي التحصيلي والكفايات

عندي اكثر من سوال

بس قبل انا حلمي طيران سواء عسكري او مدني

الاساله لطرفين


بنسبه للعسكري

كليه الملك فيصل

ال 45 يوم وش راح يصير فيها بالتفصيل الممل (لحد يقولي يجلدونك ادري بس ابي بتفصيل )

اول سنه وش راح يصير فيها

وباقي السنين

ودراسه وش المواد الي ادرسها بتفصيل

اللغه الانجليزيه متى اخلصها وهل ادرسها بنفراد ولا معها مواد

بالنسبه لحيات الجامعيه هل فيها خدش للحيا و الكرمه بحجه انك داخل عسكريه

كيف طريقه السكن هل هو وصخ ولا نظيف بنفراد ولا جماعي فيه مكيفات

ماهي ابرز العقوبات عند المخالفه

بنسبه للوظيفه هل اصير طيار بكل ماتحمله الكلمه من معنى ولا اخر شي على مكتب

او هل كل من درس طيران صار طيار

وماهي الاختبارات الي يمر بها الطالب عشان تحدد هل هو مأهل لطيران بدنياً مثل جهاز مادري وش اسمه

بس هو عباره عن طرد مركزي لمده 15 ثانيه هل هو موجود الي هدفه يشوف انت تنصفر ولا لا

والعسكريه على شكل هرم من الملازم الى الوزير فا الى متى الترقيات ومتى احتمال يقاعدوني

كيف طريقه الترقيات

اهل يحق لي المشاركه في صقور الجزيره وماهي الشروط

وهل يحق لي المشاركه في العلم الاخضر والاحمر

ماهي المميزات للموظف

كيف نظام الاجازات

__________________________________________________

طيران مدني

هل تنصحون بالدراسه بالسعوديه طيران

هل الابتعاث مفتوح هالسنه 1433هـ هذي وماهي الشروط

كم سنه الدراسه سواء بالسعوديه او في الخارج

كم المكافئه الشهريه

مناطق الدراسه في السعوديه

هل الوظيفه جاهزه

هل استطيع تغيير الوظيفه من الخطوط الى اي شركه طيران

بنسبه للوظيفه هل هي متعبه

هل اغيب عن اهلي لعده ايام

كيف طريقه الترقيه

هل انا مخير بين داخلي ودولي

ماهي الميزات التي تطرحها الخطوط للموظف او الطيار

كيف طريقه الاجازات

[a7m4d]

ماشاء الله تبارك الله .. بقولك اللي عندي من علم:


طيران مدني

هل تنصحون بالدراسه بالسعوديه طيران ؟
على حسب ميول الشخص , وانا عن نفسي هذا ميولي ولا كان نفسي بالطيران الحربي بس مافي امل بخصوص تقوس القدم!!

هل الابتعاث مفتوح هالسنه 1433هـ هذي وماهي الشروط؟
والله مافي خبرر اكيد انا حاولت ادق عليهم كل واحد يحولني لواحد , وفي الاخير خلص الرصيد , خيرة ان شاء الله.. لكن فيه ان شاء الله.

كم سنه الدراسه سواء بالسعوديه او في الخارج ؟
خمس سنين , لغة انجليزية اول سنة مصطلحات وكذا يعني. ومافي دراسة بالسعودية حكوومية فيه اهلية فقط. الحكومية ليست مخصصة لخريجي الثانوية العامة.

كم المكافئه الشهريه
بالبعثة اثناء الدراسة , 1866 دولار تقريباً. وانت عليك السكن والاكل والشرب , واعتقد المكافاة كافية لهذا كله.

مناطق الدراسه في السعوديه
لاتوجد.

هل الوظيفه جاهزه ؟
سمعت ناس كثير عانو والله العالم .. البعثة الداخلية افضل مافيها الضمان الوظيفي.
هل استطيع تغيير الوظيفه من الخطوط الى اي شركه طيران
اذا كنت دارس على حسابك الخاص , ام على حساب البعثة فأعتقد في تعهد بعد ماتخلص دراسة تشتغل عندهم.
بنسبه للوظيفه هل هي متعبه

هل اغيب عن اهلي لعده ايام


السؤالين اجاباتهم هنا:
[سـؤال] أسئلة عن الطيارين ( تم تغيير العنوان )

[سسلام عليكم]

الله يعطيك العافيه اخوي وماقصرت وانتظر المزيد من اخوانك

[motaib]

كليه الملك فيصل

ال 45 يوم وش راح يصير فيها بالتفصيل الممل (لحد يقولي يجلدونك ادري بس ابي بتفصيل )
تغيير من حياتك المدنية للعسكرية ,
ماراح تنجلد ولا شي ولا يقطع الراس الا الي ركبه
يعني ايام عاديه راح يبقى منها الذكريات


اول سنه وش راح يصير فيها
اول سسنه درررآسة لغة انجليزية

وباقي السنين
السسسنه الثانيه تقريبا
عباره عن دراسة في جناح التعليم + طيران ع طيارة الموشاك الصغيره

ودراسه وش المواد الي ادرسها بتفصيل
فيزياء + مواد ثانيه تتعلق اكثرها بالطيران والرادارات وكذا

اللغه الانجليزيه متى اخلصها وهل ادرسها بنفراد ولا معها مواد
مدرسة اللغه في الكليه حلوه جدا
تخلص اللغه من 6 الى 8 اشهر

بالنسبه لحيات الجامعيه هل فيها خدش للحيا و الكرمه بحجه انك داخل عسكريه
والله ي الطيب لازم تكوون طويل بال
العسسسكريه شينه ترى

كيف طريقه السكن هل هو وصخ ولا نظيف بنفراد ولا جماعي فيه مكيفات
اسسسراب الكليه الجوووية الجديده جدا جدا جدا راقيه
وكل شخص منفدر بغرفته
ال 5 نجووم


ماهي ابرز العقوبات عند المخالفه
العسسسكريه شينه قلت لك
بتشوف انواع النفسيات والتوقيف خميس وجمعه

يعني تعال وانت بايع الدنيا برا بريال

بنسبه للوظيفه هل اصير طيار بكل ماتحمله الكلمه من معنى ولا اخر شي على مكتب
اذا انقبلت على انك طيار
راح تصير طيار محترم ولك سمعتتك من تكون طالب

او هل كل من درس طيران صار طيار
الاغلب اخوي
نادرا مايتعرضون لمرض جوي ينزلهم من الطيران

وحتى لو اصبت بمرض جوي يدخلونك برنامج لحل مرضك

وقليييل جدا من يتنزل من الطيران

الاغلب يتنزلون بسبب سلوكهم فقط

وماهي الاختبارات الي يمر بها الطالب عشان تحدد هل هو مأهل لطيران بدنياً مثل جهاز مادري وش اسمه
فيه اختبارات مقدرة طيران
بعد الكششف الطبي طبعا

عباره عن عدادات للطياره يشرح لك خصائصها بسرعه وتبدا انت تجاول ع الاسئله بعدها

وعباره عن حسابات رياضيه

واختبارات تركيز
بحيث تفعل 3 اعمال في نفس اللحظه
مثل ( جمع + واختبار اللون الظاهر في الشاشه + كتابة الحروف الظاهره امامك )

بس هو عباره عن طرد مركزي لمده 15 ثانيه هل هو موجود الي هدفه يشوف انت تنصفر ولا لا
ما اعرفها ذي

لكن في الاختبارات المبدئيه مافي اي شي من الي كانو يقولون عنه

مثل الكرسي الي يلف بك وكذا

كلام فاضي

بس كششف طبي واختبارات انجليزي ومقدرة طيران ع الكمبيوتر

والعسكريه على شكل هرم من الملازم الى الوزير فا الى متى الترقيات ومتى احتمال يقاعدوني
يالله بعد عمر طويل
العسكريه بعد ماتتخرج رتبك تمشي ووضعك تمام

البلى وانت في الكليه هههههههه

كيف طريقه الترقيات
من ملازم الى رائد تكون الترقية بعدد سنوات معينه
ومن رائد وطالع
تكون الترقيات بالمنح تقريبا او ماشابه ذلك

اهل يحق لي المشاركه في صقور الجزيره وماهي الشروط
بعد التخرج اثبت جدارتك في الطيران وممكن تصير اي شي تبيه

وهل يحق لي المشاركه في العلم الاخضر والاحمر
ماعندي خلفيه
انا طالب في الكليه للحين

ماهي المميزات للموظف
مافهمت هالسؤال

كيف نظام الاجازات
نظام الاجازات ممكن تقول انها معدومه

يعني الاجازه الكبيره بس شهر رمضان + 5 ايام العيد
اسبوعين اجازه الحج

واسبوعين في شهر 5

فقط


__________________________________________________


واخوي انصحك تشاور نفسسك قبل تدخل المجال العسكري

ترى فيه فرق شاسع جدا جدا جدا

وادا وجدت بديل للعسكريه انصحك لاتفوته

< اكلمك وانا احمل وجهات نظر لاكثر من 120 طالب دخلنا هالسنه

الكليه من الداخل تختلف عن نظرتها من برا

واذا تبي معلومات اكثر في موضوع تجمع لطلاب الكليه في هذا القسم

واسف ع الاطاله

[سسلام عليكم]

الله يعطيك العافيه

والله انك بردت تسبدي بالاجوبه

لكن ابيك بتفاصيل ادق

ابي اتواصل معك على الواتس اب


هذا رقمي 0551538383

المشكله ما اقدر ارسلك على الخاص

يقول لازم 10 رسايل

[navy pilot]

جزاك الله خير