طيب راح احاول اكتب الاشياء الحلوة والاشياء السيئة من وجهة نظري لما كنت ادرس عندهم انا خلصت عندهم ال ppl تقريبا من مارش 2017 الى جولاي او اوقست 2017
الاشياء الحلوة
اولاً : الطيارات للامانه الطيارات تعتبر جديده مقارنه بمدارس كثير في امريكا طياراتهم سيسنا مزوده بنطام G1000 + طيار الي + خزان وقود اضافي للرحلات الطويلة اتكلم عن طيارات محرك واحد ونظيفة تعتبر داخليا وخارجيا والحق يقال لاني درست فيها وفي امريكا لو لقيت طيارات في امريكا نفس هذي المواصفات راح تلاقي سعر الساعه فيها مقارب لسعرهم والله اعلم لكن امريكا تقدم خيارات هذي مافيها خيارات تبي غالي موجود رخيص مافي.
ثانياً : الدراسة الارضية ( Ground school ) الصراحه شي جبار مدرس فاهم من الى في المجال هذا اي سؤال انشالله ماراح يخليك الا لما يفهمك كتاب كامل من جيبسون يغطيه كامل هذي من افضل الاشياء اللي ساعدتني للرخص اللي قدام ان تاسيسي كان قوي شوي في اول رخصه في الدراسة الارضيه.
ثالثاً : تعامل الموظفين اللي في المدرسة في رابغ شي يشكرون عليه الصراحه شباب يحبون يساعدونك قد مايقدرون واخلاقهم عاليه انا عن نفسي ساعدوني كثير.
رابعاً : جودة المدربين لللامانه المدرب تحس باحساس بسيط انه يبي يعلمك من جد مو عشان يبي ياخذ فلوس لا من جد وده انك تتطلع طيار محترف خصوصا اذا ساعدته انت وتجي دايما قاري الدرس اللي عليك والمناورة اللي راح يعلمك هي والاشياء اللي قلك سويها قبل لاتجي لانه راح يعرفك من قيادتك للطياره انك سويتها ام لا واذا شافك متساعد راح يعلمك افضل الطرق وانا كنت موجود يوم كان في مدرب مش ولابد مايدرب الطلاب صح ولا يهتم فيهم اشتكو عليه اكثر من واحد وطردوه لان ماعنده كفائة في التدريب .
خامساً : الطلاب اللي موجودين ماشالله عليهم تعاون وكل واحد يبي يفيد الثاني ويحاولون يساعدون بعض دايما.
سادساً : المطار وموقعه شي حلو ومو حلو في نفس الوقت انا بذكر الشئ الحلو المطار جدا بسيط عبارة عن مواقف وهنقر للصيانه وخزان وقود ومدرج واحد رئيسي ويعتبر كبير للطيارات الصغيرة ومدرج صغير احتياطي وهذا بما ان المطار في متدربين فحلو ان المدرج يكون كبير عريض وطويل عشان لاقدر الله اذا احد غلط في الحسابات في الهبوط او في الكروس ويند مايجيب العيد وغير كذا مافي زحمه للتكسي واخذ تصريح للاقلاع وضياع وقت لا الكلاس حق المطار G uncontrolled يعني شغل سوي الرن اب وطير الحلو ان اغلب الوقت اللي راح يدفعونك عليه انت قاعد تستفيد مافي انتظار كثير للطيارات الثانيه او اشياء زي كذا.
طيب الان خلصنا حسب علمي والاشياء اللي اذكرها الزينة والطيبه واللي تحسب للمدرسة الصراحه. نبتدي في الجانب المظلم للمدرسه
اولاً : عدم وجود مدربين كفاية مقارنة بعدد الطلاب وهذي للاسف مشكله كبيرة تسبب تاخير للطلاب بشكل خيالي والضغط على المدربين ولا ياخذ الوقت الكافي مع كل طالب عشان يعطيه حقه من الشرح وايضا تسبب عدم ترتيب في الجدوله للطلاب وتنتكنسل بعض الرحلات للطلاب وتاخير بعض الرحلات هذا شي طبيعي يصير في المدرسة بهذا السبب.
ثانياً : التاخير في صيانة الطائرات وانا لا اعني انهم مايهتمون في صيانة الطائرات لكن بحكم انهم يطلبون القطع من برى فاذا صار شي لاقدر الله في الطيارة جامد يعني اخترب والطيارة غير مسموح تطير الا فيه يوقفون الطيارة ويطلبون القطعه وعادة تتطول الين ماتجي ويصلحونها وتصير مسموح انها تطيير.
ثالثاً : موقع المطار في رابغ وبحكم انه كان عسكري في عليه بوابه عسكرية معقدينها شوي عشان تدخله لازم تصريح ولازم بطاقه اذا انت من الطلاب واذا بتجيب احد معك لازم تصريح واذا نسيت البطاقه صعب تدخل ولطعه في الشمس حتى لو يشوفونك كل يوم لازم البطاقه معك.
رابعاً : بعد ماتاخذ اول رخصة تصير طيار رسميا تقدر تاخذ الطيارة على مسؤوليتك لكن مايعطونك الثقه كطيار لازم يوقعلك المدرب او الشيف بايلوت او مدير التشغيل هذا الللي اعرفه في وقت ماكنت عندهم وهذا يسبب تاخير لك وعدم الثقه في نفسك وفي نفس الوقت ممكن يكون زين لك اذا كانت معلوماتك قليله وحكمك كطيار سئ او متهور راح يوقفونك ويقولولك مثلا الجو مايسمح مانقدر نعطيك الطيارة او مثلا الهوا قوي لكن انا اشوفها شي سئ اكثر والله اعلم .
خامساً : عدم وجود خيارات اكثر مثلا في الطيارات وفي الاسعار يعني اذا انا قدرتي الماليه ضعيفه صعب ادرس عندهم ماعندهم الا الشي الغالي ولو انه جودتة عاليه لكن مره غالي تقدر تجيب شي جودته متوسطه وتنقص السعر يعني ياليت يكون فيها طيارات بدون G1000 وماهي جديده مره وينقص السعر بدال مااخلص 300 الف اخلص 220 الف او اقل .
سادساً : بحكم ان المطار في مكان بعيد ومافي زحمه والمطار مافيه برج مراقبه مايكون في خبرة بالاحتكاك بجو الطيران مثلا زي التنسيق مع الطيارات الاخرى او التكلم مع برج المراقبه وطلب التصريح للهبوط وللاقلاع وهذا يخليك مثلا اذا رحت مطار جده تكون مرتبك كثير لان جوهم هناك طيارات زحمه وبرج مراقبه انت ماتكون متعود على الجو هذا بالرغم انه التشيك رايد راح يكون من جده في الوقت اللي انا كنت فيه.
سابعاً : نفس مبنى المدرسة تعبان ومافيه امكانيات كثير وضيق والحمامات الله يكرمكم تعبانه هذا في وقتي ماادري اذا الان طوروه او لا اتوقع انه تطور الان.
الدراسة الارضيه كانت في رابغ في وقتي لكن سمعت انه خلوها في جده الان وهذا من وجهه نظري راح يشتت الطلاب شوي واتوقع انه في ناس يعتبرون هذي ميزه والناس تختلف والله اعلم.
طيب الان في اشياء اود ان اذكرها يعني ماللمدرسة دخل فيها ولا الطلاب:
_ الجو جدا حر هناك في رابغ
_ مافي خبرة في الطيران كثير لان مافي زحمة كثير مافي تعامل مع زحمة كبيرة مع طيارات ثانيه مافي خيارات كثيرة في المطارات ومافي كلاسات كثيرة للايرسبيس عشان تاخذ خبرة بشروط الارسبيسس ولافي غيوم كثير عشان تتعود وتعرف الحدود في الطيران لما يكون في غيوم الاجواء تقريبا يوميا نفسها.
طبعا انا هذي الاشياء اللي اذكرها انشالله مااكون ظلمت المدرسة ولا اكون غاليت فيها
ان اردت الا الافادة والاصلاح: الافادة للطلبة اللي يبون يدرسون طيران مدني وايضا احاول ان اعطي المدرسة نبذة عن الاشياء اللي ممكن تعدلها عشان تكون امثر جاذبية للطلبه من عيون واحد من الطلاب اللي درسو فيها
ارجو منكم الدعاء بالتوفيق والنجاح والجنة