السلام عليكم..
أنا لي فترة اسفيد من المعلومات من هدا المنتدى وما اشارك, لكن اليوم حبيت اني افيد الجميع بحكم اني استفدت.
أنا اختبرت اللغه ونجحت, وامس رحت المقابله الشخصيه وحاب اعطيكم نصائح عن المقابلة..
أولا البس بطلون أسود وقميص أبيض أكمام قصيره, دخل القميص في البنطلون وخلي شكلك يكون رسمي.
أحلق دقنك او رتبها كانك رايح تخطب ( الشكل عندهم مهم جدا )
انا طولي 171 ووزني 75 قالولي لازم تنزل 5 كيلو ( قس على ذلك)
لما تدخل على المقابلة خليك ايجابي أجلس منتصب وتكلم بصوت واضح ومسموع, اللي يسوي معاك المقابله شخصين توقع منهم الاستفزاز بطريقة أو باخرى عشان يبغون يشوفو مدى قدرتك على التحمل, مثلا لما يسالك سوال وتجاوب عليه فجأه في نص الجواب يقلك ايش ؟!! كانه ما سمع بس باسلوب خشن واستفزازي انت كرر جوابك بابتسامة وبدون انفعال, حيطالع فيك من فوق لتحت كانه مستحقرك خليك مبتسم ولا كانه في شي..
الاسئله حتكون عن نفسك وعن خبراتك وايش كنت تسوي فيها وايش طبيعة عملك وليش اخترت تكون مظيف جوي..
ادق التفاصيل تكون مهمه عندهم, امشي على اللي قلتلك عليه وان شاء الله امورك تمام.
جهز نفسك انك حتقولها كلها باللغه الانجليزيه وفالكم التوفيق.
أخوكم : أنس