[ayman_52]

-::الســلام عليكم ورحمة الله وبركاته::-


ممكـن ادردش معاكم شويـــا


اولا : انا بجد سعيد جدا انى لقيت منتدى زى المنتدى دا , ودا كان بالصدفه وانا بدور على كلمه مضيف طيران فى الجوجل وطلعلى المنتدى دا .. ماصدقتش نفسى ان فى منتدى متخصص فى المجال دا

ولما دخلت فيه وقريت المعلومات الجميله اللى موجوده , زاد اعجابى بيكم الصراحه

.
.

ندخل فى الموضوع على طول

انا اخوكم ايمن من القاهره , مخلص كليه تجاره وحاليا بدرب فى بنك محترم كنت بدرب فيه كل سنه فى الصيف

انا ادربت فى شركات محترمه كتير (كمحاسب طبعــا) وكنت مضبط نفسى انى بعد الكليه هقدم فى اى مكان كنت بدرب فيه مع واسطه كويسه ... واكمل فى المجال اللى درسته (اللى مش بحبه اصلا)

وفجاة وانا قاعد فى البيت فى يوم اجازه , لقيت كلمه مضيف طيران دى جت على بالى , ومش عارف ايه اللى خلانى اقوم ادور عليها يومها ... ومن يومها وبدات رحلتى فى الموضوع دا ....


موضوع الضياقه ماجاش من يوم وليله عندى , من وانا صغير وكل مره اكون نازل من الطياره والاقى المضيفيين ماشيين فى المطار ولابسيين الزى بتاعهم الجميل دا وشاديين شنطهم وراهم وانا اقول فى نفسى الله جميله اوى الشغلانه دى (طبعا كنت صغير ومعجب بالشكل فقط)


والفكره الجميله دى فضلت فى دماغى ساكنه من ساعتها , ومن ساعة ماخلصت الجامعه وفجاءه لقيت نفسى بسترجع شريط حياتى وكل شويا الاقى ان فعلا الضيافه او مضيف الطيران خصوصا كان دايما بيلفت نظرى .


-------------------

ودلوقتى وبعد ماتعرفت عالمنتدى الجميل دا , وقعدت اقرا موضوعات كتيره واشوف ايه اهم متطلبات الوضيفه دى , بحس انها ممكن تكون فيا ... انا بحــب :-

1- بحب اساعد الناس جدا
2- بحب التنقل من مكان لمكان مع الاحتفاظ بمكان ثابت ارجعله دايما (يعنى اسافر اسافر بس ارجع لبلدى مصر عشان بتوحشنى)
3- مش بحب الشغل الروتينى , يعنى مكتب ومعاد قدوم وانصراف
4- بحب دايما انى اكون مختلف عن البقيه


والحاجات دى لقيتها فى المجال دا


المهـــــــــــم

انا دلوقتى مستنى موقفى من الجيش وفى نفس الوقت بدرب فى البنك وباخد كورسات .. اعمل ايه ؟؟ تنصحونى بايه ؟؟؟

هل فعلا المجال دا زى مانا متخيله , ولا مش هقدر عليه واخلينى فى اللى انا اعرفه ؟؟؟

انا ساعات وانا بقرا فى الموضوعات احب المجال دا اكتر , وساعات اخاف منه ؟؟؟

انا الصراحه محتار والصراحه اول مره اتكلم واقول الكلام دا لحد , ولا حتى اهلى يعرفوا لانكم زى مانتم عارفين اغلب الشعب المصرى بيقول ايه على المضيف ودايما بيقلل من المهنه دى

عشان كده مالقيتش حد ممكن افضض معاه و يفدنى غيركـــم

اسف عالاطالـه

تحيــــــــــــــاتـــــى